I se lipoti a le faalapotopotoga o le ACC, o le vaga lenei o loo nafa ma le tuuina mai o fesoasoani pe a tulai mai ni manuaga ona o faalavelave faafuasei e aafia ai le soifua o le mamalu o le atunuu, ua latou taua ai e faapea, e silia ma le 130,000 fanau sa faamanualia mai i o latou lava fale i le tausaga talu ai.
O nei manuaga sa lei fuafuaina e sa tele ni mafatiaga na fesagaia ai. O isi manuaga ua afaina ai tino o nisi fanau mo le olaga atoa.
O le tulai mai o nei faalavelave ua fesiligia ai e nisi, pe faamata o toe saogalemu fale o aiga lava latou.
Ua fesiligia foi ni auala e mafai ona puipuia ai le toe aafia o fanau i nei manuaga.
Sa faia e le vaega ua taua o le Safekids New Zealand ni a latou suesuega ma aoaoina mai ai iuga nei.
E tusa ma le 70% o fanauiti (faasolo mai pepe seia oo i tamaiti ua tai fa tausaga le matutua) o loo faamanualia i totonu ma autafa o o latou lava fale, talu ai o le tele o lo latou taimi o loo faaaluina ai iina.
Na taua e lea vaega, “O le pogai lena e tāua ai ona avea o se vaega o tiute faamātua, le tausia o se siomaga mamā ma saogalemu i le fale, o le nofoaga tonu o loo tuputupu ae ai le fanau i o latou tino ma mafaufau.”
O nisi nei o fautuaga aogā mo le puipuia o fanau i o latou lava fale:
Ia e ano i se mea o ta‘u atu e lau tama. Punou ifo oe i lalo.
O le ā se mea o e iloa atu? Faamata e oo le tago a le tamaitiiti i le mea o iai le naifi? O iai ni pito poo ni tulimanu maamaai e ono tau ai le ulu o le tamaititi?
Puipui malu meafale mamafa. Afai e te tuu ni mea felanulauai poo ni meataalo i luga o fatatusi, televise poo laulau, o le a taumafai tamaiti laiti e fea‘ei i ai. Aveese mai na mea ae faatu latalata se meafale i le puipui e faalagolago i ai ne‘i pa‘ū.
Faaū i lalo mata o naifi poo nisi mea maai pe a tuu i totonu o le masini fuluipu.
O le tele o isi manuaga e aafia ai tamaiti, e pa‘ūū i mea maamaai i totonu o le masini fuluipu.
Teu malu meafaigaluega ma mea tau moli ma masini. Loka ese meafaigaluega mamafa poo ni naifi i se kapoti i le umukuka, le faletaavale poo se fale e teu ai mea faitogalaau.
O palau moavao e le ni meataalo e faatietie ai tamaiti. Ua tele ina avea moavao ma faapogai o ni manuaga ogaoga po ua seleia ai foi ni vaega o le tino.
Faaaoga se tioata e lē mataetae gofie, e fai ai faamalama, faitotoa, poo se meafale. Maka se tioata lautele o mafolafola i se mea ina ia faigofie i tagata ona iloa atu.
