O se avanoa maualuga ma le faafetaia e le afioga i le faletua ia Vasa Sanerivi ma aiga e lua, aemaise taitai o Matagluega a Niu Sila, Ausetalia ma Samoa le auai ma le faatasi ai o le afioga i le Sui Ao o Samoa, Tuimalealiifano Vaaletoa Sualauvi ma lana Masiofo i le toe sauniga o le afioga i le Aposetolo Rev Mesako Sanerivi.
Na valaauina faapitoa le afioga i le Sui Ao, mo sana saunoaga faapitoa i le taimi o le toe sauniga o le afioga i le Aposetolo. Na saunoa foi le afioga ia Tuimalealiifano ma ia faafetaia le soifua galue o le auauna, ona e lē gata i le faasalalauina o le Talalelei a le Alii, ae mo le faaolaina o le toatele o agaga mo le Atua ma lona malo.
Sa ia faafetaia foi le laugaina o le Afioga a le Atua, ma le moni o lea feau mo soo se tasi lava, pe maualuga pe maualalo, taualoa pe lē taualoa, a o le feau ma le savali na momoli e mo soo se tasi lava.
O lona talitonuga o le finagalo lea o le Atua, e lē o se igoa o se lotu, a o le finagalo moni ma le Upu a le Atua e tāua lea ma e ao ina faasilisiliina. Sa ia faailoa manino foi, mo ia o se taitai o le atunuu, e tatau lava ona ulufale ma e lē taofia foi lona auai, i soo se malumalu e tapuai ai soo se tagata Samoa i le Atua. Na matua leai se ofi o le malumalu o le ekalesia Faapotopotoga a le Atua i Magele, i le sauniga e faamavae atu a ii lana auauna ona ua valaau iai lona Matai, ma faamanava ana galuega ao galue pea ma le punouai i le galuega a le Atua.
E silia latalata i le selau auauna a le Atua mai Fatafaitaulaga eseese sa faalia o latou agaga faaaloalo e ala i le auai ma mafuta faatasi i lona toe sauniga. O le Aso Toonai o le vaiaso talu ai, na faia ai toe sauniga o lana auauna ma molimoli ai i lona nofoaga tumau i le fanuatanu i Papatoetoe, poo Manukau Memorial i Papatoetoe lava.
O le molimau a le afioga i le faletua ia Vasa Sanerivi, sa ia toe faatepa ai le mamalu o ē na auai i le sauniga, i le tāua ma le mafanafana o le la mafutaga ma le Aposetolo. O se mafutaga vavalalata tele ma sa iai foi le fiafia ma le olioli i taimi uma.
Ae ui i lea, ua faia pea le finagalo o lona Matai sa auauna i ai. E tuumalo le afioga i le Aposetolo, ua toe o se masina ona atoa lea o lona fitu sefulu tausaga. Na tuufaatasia ma le faletua ia Vasa i le tausaga e 1966, ma e toaono o la alo, e toatolu alii, toatolu tamaitai.
Soifua galue mo le galuega a le Atua
O le tausaga e 1975 na avea ai ma Faifeau ina ua faato‘ā 33 o ona tausaga. O le 1976 na ia uluai faatuina ai le Assemblies of God Church in New Zealand, poo le Faapotopotoga a le Atua i Niu Sila, ma o ia foi na ia faavaeina lea igoa e oo mai lava ina ia tuumalo.
E 28 ekalesia i Niu Sila lava ia, e 24 ekalesia i Ausetalia, ma le ono o loo iai i totonu o Samoa. O le tuufaatasiga e tusa ma le 58 aulotu poo ekalesia i Niu Sila, Ausetalia ma Samoa, sa fananau mai i le tofamamao ma le faaaliga sa muai iloa ma silasila i ai Aposetolo Rev Mesako Sanerivi, mai le Atua i le amataga seia oo mai i le 2011, ua faamānavaina ai ana galuega ma lona valaauina.
Sa avea ma taitai aoao o le galuega i Niu Sila, a o lei faaee i ai le tofiga Aposetolo, ona o le faaeaea a taitai o le lalolagi ma Matagaluega uma e amanaia ai lona soifua tautua ma le maelega i le galuega a le Atua. O lana tautua faaiu poo lana galuega mulimuli e momoli ai pea lona finagalo alofa i taitai ma auauna a le Atua sa latou galulue faatasi i le tele o tausaga, sa faatinoina e le faletua ma le fanau ma aiga, aemaise o lana ekalesia pele. O mealaofa sa tauaaoina mo Matagaluega, e aofia ai le ta‘i $15,000 Niu Sila. E $15,000 mo Niu Sila, $15,000 mo Ausetalia, $15,000 mo Samoa, faapea palapalamalo.
Ae mo Faifeau uma e tusa ma le 66 e ese mai faifeau o ekalesia o loo i lalo o le taitaiga a Mesako lava ia, sa tofu ma le teutusi tupe ma pusa pisupo tailima e oo lava i le tailua sa faailoa ai le valevale alofa ma pelega o le Aposetolo mo le galuega.
O le susuga lava foi i le auauna Pastor Fereti Toleafoa, sa fai ma sui o aiga na lua e momoli le faafetai, atoa ai ma le faasoasoaina o taumafa, palapalamalo faapea seleni na matuā tofusia ai le aufaigaluega a le Atua i Matagaluega e tolu, aemaise o uo ma paaga i le Talalelei sa auai i le toe taimi o lana auauna.
Le auauna lelei e, ulufale maia i le fiafia o lou Alii!
