Pei o ni ufi e tutupu i loto ma lagona o le toatele o leoleo le naunau e fia auai i le faamanatuina o le Iupeli Auro o si o tatou Malo Tutoatasi. E le gata o tamafanau a Samoa lava ia o galulue i matagaluega a Leoleo, ae faapea foi i nai papalagi ma i latou uma.
Na taulamua i lea sauniga faapitoa le Mafutaga malosi i le itu i Matu o loo tumatilatila ai le Maota Samoa auā Fonotaga, le Mafutaga a le Aiga Samoa Inc i North Brisbane lea o loo Peresitene ai le afioga ia Taulapapa Lemalu Roy Slade.
O le susuga i le faafeagaiga ia Ps Leivi Mulitauaupele sa saunoa faamanuia ma tatalo e tapuaia le toesea o le aumalaga mamalu ona o le faamoemoe o le atunuu. O le failautusi ia Saveatama Elizabeth Hunt sa fai ma fofoga o le aso e pei ona faataunuuina i le ta o le sefulu i le taeao o le Aso Tofi 24 o Me.
O le matagofie o lea taeao ona sa mafai ona auai le tele o malo faaaloalogia, sa auai foi le pule sili o le ofisa malaga lauiloa numera tasi i Brisbane, Sina World Travel, le afioga ia Lemalu Patricia ma Steve Sevele, sa lagolagoina le aumalaga mo pasese ma nisi vaega uma o le faigamalaga.
Na lava tapena i latou uma i saunoaga faalaeiau a le taitai o le sauniga, Peresitene o le Mafutaga ma nisi o sui mamalu na auai faatasi ai ma le tauaaoina o se meaalofa tāua o le fue ma le tootoo sa tauaaoina e le Taitai leoleo ma le matagaluega sa gapatia ma saunia e le Mafutaga a le Aiga Samoa INC i le itu i Matu, afioga ia Taulapapa Lemalu Roy Slade ma le tofa ia Lealaogata Paepaetele.
O le Mafutaga foi lea ua alo atu e tapena le 50 tausaga o Samoa i Brisbane nei, ma ua sauni le tele o mafutaga, faalapotopotoga, Ekalesia ma le lautele o le atunuu e lagolagosua.
E ova atu ma le to‘a 70 le aumalaga a leoleo e aofia ai ma i latou o faigaluega i le Matagaluega a leoleo o loo ua tuuvaa atu i Samoa e molimauina lea aso faapitoa i talafaasolopito ole atunuu faatasi ma le latou savali faaaloalo e faaailoa atu ai lo latou amanaiaina o le aso.
Na toe faamanatu e le failautusi i nai leoleo papalagi ina ia tautuana aua nei misi ni malu taeao ma faatagataga ni faaleoleo i nai taumafa i le taimi e savavali ai ona e fai sina umi o le ala ma vevela le la. O le faalua ai lenei ona alu o le malaga a le ofisa o leoleo (QPS ma le PLO) e pei ona malaga atu ai i le Teuila o le 2011 ma tauaaoina ai se valaaulia faapitoa e toe taliu atu i le faamanatuina ole 50 tausaga ile tausaga nei.
Sa faafeiloaia le North Coast Region Assistant Commissioner Stephdffen Gollschewski ma le Chief Superintendent Ray Pringles; Aunty Lynn Matsen (Aboriginal Elder) o se fiafiaga foi ia te ia le sauni atu e malaga i Samoa.
Sa lauga foi le sui ole Redcliffe District Acting Superintendent Mark Jones. O le susuga i le alii leoleo Samoa Rarotonga Tevita, o ia lea o le Officer/trip coordinator faatasi ai ma Sergeant John Warner ma se tasi o Satini Litaea o sergeant Richard Clark.
O sesd tasi o toa sa uluai fofoaina le Mafutaga a le Aiga Samoa INC o le afioga ia Samataua Hanamenn Hunt o loo iai i Samoa i le taimi nei.
Talitonu i le agalelei o le Atua o le a toe toe taliu manuia mai ai le faigamalaga pe a tusa ma le finagalo o le Tamā o le lagi e ‘au o manu le Aso faamanatuina o le Iupeli Auro o Samoa.
