Auai atu Samoa mo le Fono a le WTO

Ua faamaonia e le Kapeneta le auai atu o sui o Samoa i le Fono a le faalapotopotoga o fefaatauaiga saoloto a le lalolagi le World Trade Organization (WTO) o loo usuia i Sineva i le vaiaso nei.
Ma ua taua i se pepa o faamatalaga mai le ofisa o faamatalaga a le Malo, ua faapitoa e le WTO e faatino ai ni feiloaiga ma ona sui. O le a maua ai foi ma avanoa e talanoaina ai lipoti a atunuu poo sui o loo tau faaofi atu i totonu o le WTO, lea o loo aofia ai ma Samoa. O le Aso Faraile nei o le a faia ai le iloiloga mo le fia ofi o Samoa i le faalapotopotoga lea, o le a tuuina ai le avanoa e tali atu ai Samoa i ni fesili a atunuu ua avea ma sui auai o le faalapotopotoga.
O nisi o mataupu o le a faapea ona fesiligia ai Samoa, e aofia ai: le faasaina o le auina mai i totonu o Samoa o siusiu pīpī; le faasaina o le auina mai o taavale e i le itu agavale foeuli; le faasaina o le auina mai i totonu o Samoa o taavale e silia i le 12 tausaga talu ona fausia; o tulafono ma mataupu tau Tiute, faapea ma isi fesili i vaega o loo fia maua ai e le WTO se silafia.
O le usugafono a Samoa o loo auai atu i lea fonotaga, e aofia ai le susuga Auelua Samuelu Enari, o ia o le Pule Lagolago o le Matagaluega o le Vaifafo ma Fefaatauaiga; o Nella Tavita-Levy, o se tamaitai Ofisa Sinia o le Matagaluega o le Vaifafo ma Fefaatauaiga, faapea ma le tamaitai ofisa o Fiona Lene.
E iai le faamoemoe o le a tele se aoga o le auai atu o sui nei o Samoa i lenei foi fonotaga taua a se faalapotopotoga tele a le lalolagi, e tatala atili ai nisi malamalamaga i mea uma e ao ona nofo silafia i ai aua lava le faaleleia atili o ana fefaatauaiga i fafo ma isi atunuu, aemaise lava le atili faalauiloa atu ai o le auala o loo faagaoioiga ai pulega lelei i totonu o le atunuu.