Aua nei galo – Samoa mo Samoa

O le momoliina mai o le soifuaga sa soifua ai mātua poo tuaa foi o Samoa i le tele o tausaga ua mavae ina ia faailo i tupulaga Samoa i nei ona po, o se tasi lea o faanaunauga na iai mo le alii Samoa o Edward Peni, e pei ona ia tusia ai i le pepa faailo o loo faalauiloa ai le tala faatino (play) ua faaigoaina o le Samoa mo Samoa.

O se tala na tuufaatasia e tamafanau a Samoa ua maualuga foi le tulaga o iai le soifua a‘oa‘oina i Niu Sila nei.

I lalo o le taitaiga a le susuga Obed Unasa sa galulue faatasi ai ma le tamaitai o Jeanie Tualima ma le faatonu o le polokalame, Edward Peni i le tuufaatasia lea o se tala faatino e faatatau i le soifuaga finau o Samoa sa iai i tausaga ua tuanai, ma le amataina mai o le Mau, o se vaega tāua i le talafaasolopito o lo tatou atunuu ma le finauina o le tutoatasi mai atunuu na puleaina Samoa i na ona po.

Manatua ananafi, ola i le asō ma miti i le lumanai

O upu faalaeiau a se tasi o tagata iloga i le lalolagi, Albert Einstein sa avea ma luitau mo i latou sa galulue i lenei faamoemoe.

Na ta‘ua e le susuga Obed Unasa, na te manatua aso a o itiiti ma tala e faatatau i le auai ai o si ona tuaa i le Mau, aemaise o le alii papalagi mai Niu Sila nei o General Richardson i le vaitau o le 1920 ma luma mai.

E lei faigofie e pei ona faailoa foi e le tamaitai tusitala o Jeanie aemaise ona o le tele o fetuunaiga sa taumafai i ai ina ia mafai ona maua se auala e momoli ma faailo ai i le au maimoa le mea moni sa iai foi soifua i lea vaitau.

E lasi lagona ina ua molimauina le tala faatino e pei ona gapatia ai nai alo ia o Samoa faatasi ai foi ma nai alii papalagi sa faatinoina isi vaega o le tala.

O i latou na faatinoina le tala e aofia ai Hans Masoe, Henry Hung Li Cheng, Adam Samu, Kopano Simanu, Raymond Leaia, Valentino Maliko, Phil Brooks, Ben Legg, KC Throne Myers, Nastassia Wolfgramm, Samson Chan Boon ma Rohan Glynn.

O i latou sa galulue malosi i le tuufaatasia o le faamoemoe. E faaopoopo atu i ē ua ta‘ua i luga, e aofia ai Peter Apulu, Pei Helen Amituanai, Manu Faaea Semeatu o le faiaoga foi lea sa nafa ma le itu tau musika o le play, Buchanan Niuapu ma Monique van der Kolk.

Sa faailoa foi e le susuga Obed i lana tusitusiga, o le isi laasaga ina ua mae‘a ai ona faailoa le tala faatino lea, o le a faailoa i se taimi e lē o toe mamao.

O lona uiga e pei ona taatele foi i finagalo o nisi sa auai ai i le maimoaina o lenei taumafaiga, ua alagatatau loa ona amata ni tapenaga mo le tuuina atu e avea ma ata tifaga ma nai teuteuga laiti e matagofie foi pe a toe faaopoopo i ai.

Sa faatumulia le maota o Arts Center i Magele i le lagolago a mātua, aiga uo ma ē masani na mafai ona tali i le valaau a le Samoa mo Samoa, na amata mai le Aso Lua o le vaiaso na tea nei seia oo i le Aso Toonai.

O le toatele o ē na auai o le tupulaga talavou Samoa i Niu Sila nei, o i latou tonu ia sa momoo foi i ai le polokalame ina ia mafai ona faailo i ai le malamalama lea o le soifuaga tauivi na iai tamā ma tina o le atunuu i na ona aso ua fai ilagi le folauga ae ua nofo manumalo ai nei Samoa ina ua tutoatasi ma lē toe pulea e se isi atunuu e pei ona sau ai tausaga ua mavae.

Ua moni ai le igoa o le tala, Samoa mo Samoa ae faavae foi i le Atua Samoa.

Momoli le faamalo ma le faafetai a le toatele i lenei taumafaiga ma le lagolago ina ia faaoo atu i le isi laasaga e sosoo ai, mo le faamalosia foi o nai tupulaga ma alo Samoa i Niu Sila nei e manatua pea si o tatou atunuu ma le saili malo na iai i le tuanai, ua oaoa ai nei i Faleseu ma sapi i maa o mālie e pei o upu a le atunuu.