Toe faatalofa atu Samoa le atunuu pele, malo le onosai i feau ma galuega o lena vaiaso ua tuanai atu.
O le viiga ma le faaneetaga e foi atu pea i le Atua poto e toatasi, aua o Ia lava ua mafai ai ona tatou aulia manuia mai lenei vaiaso fou, ua toe amataina foi feau ma a e masani ai. Poo fea lava o e maua mai ai lenei tusitusiga, o le tatalo a le Taiala ia laugatasia i tatou uma i le pule alofa a lo tatou matai sili i le lagi.
1 Ioane 3:7, “Le fanau e, aua nei faaseseina outou e se tasi, o lē fai le amiotonu, o le amiotonu lea, faapei ona amiotonu ia.
O le fai lē agasala, e mai le tiapolo lava ia, aua ua agasala le tiapolo mai le amataga, o le mea lea ua faaali mai ai le alo o le Atua, ina ia faaumatia e ia galuega a le tiapolo.”
O se tasi lenei o itu ua faavaatuia ai le folauga a le tele o nisi tagata, ua uma ona fai filifiliga latou te mulimuli atu ia Iesu. O le avea o oe ma soo o Iesu, o se filifiliga e ao ona matua mataituina.
Ma o le mafuaaga tonu foi lea e ao ai ona fausia o tatou olaga, faapei o le fale ua fau le faavae mautu. A oo mai tafega, matagi ma lologa, e leai se mea e popole ai, aua ua fau lou fale i luga o le papa mautu, o Iesu Keriso lava lea.
O le tele la o taimi, ua tatou faapea ane ua lelei mea uma. Ua tatou talia Iesu e avea ma alii sili i o tatou olaga, a o le faalavelave ua le ogatusa a tatou tautinoga ma a tatou faatinoga.
Ae o le mafuaaga lena na fetalai ai Iesu i le Luka 6:46, “Se a le mea e ta‘ua ai au e outou, Le alii e, le alii e, ae tou te le faia mea ou te fai atu ai ia te outou?”
Ae o le feau foi lea na taumafai le aposetolo o Ioane e molimoli atu i le au Kerisiano i lea vaitau.
O le taimi tonu lea o le tuputupu o le galuega feliuaina e ala i le upu a le Atua, ma ua liua ai le toatele ma tuuina atu o latou ola i le Atua. Peitai, a o tupu pea le galuega a le Atua, sa faapena foi ona tupu ma olaola le sosolo mai o talaiga sese ma ua avea ma mea e faaseseina ai loto ma mafaufau o tagata.
O le mafuaaga tonu lena na apoapoai atu ai Ioane, ma faamalosi atu ai ina ia mataala, aua nei iai se avanoa e faaseseina ai i latou e le fili.
O se tasi lea o aupega malosi a le fili ua faatoilaloina ai le toatele o tatou.
Ae o loo manino le afioga a le Atua pei ona faailoa atu e Ioane i le au Kerisiano o nuu ese, na ia faapea atu ai, O le Atua, o ia lava o le malamalama, e leai se pouliuli ia te ia.
O le taimi lava na tuuina atu ai o tatou ola i le Atua, na faapena ona sulugia ai o tatou mata i le malamalama o le Atua, ma ua le toe iai se avanoa e tumau ai pea i tatou i le pouliuli. E le mafai foi ona nonofo faatasi le malamalama ma le pouliuli.
O loo molimau foi le Tusi Paia, afai ua tatou faapea ane ua tatou mafuta faatasi ma ia, ae savavali pea i tatou i le pouliuli, ua tau pepeloina i tatou, ua tatou le faia foi le upu moni.
Pe faapefea ona tatou iloa ua tatou faia le upu moni? 1 Ioane 2:3 & 4, “O le mea lea tatou te iloa ai ua tatou iloa o ia, pe a tatou tausi i ana poloaiga. O sē le tausi i le poloaiga, o le pepelo lava lea, e lē o ia te ia foi le upu moni.”
Samoa e, e manino lava le afioga a le Atua. Talitonu foi ua loa ona e silafia poloaiga uma e pei ona faamanatu mai e Ioane, aua o mea nei na aoaoina mai ai i tatou a o laiti seia oo mai lava ina tatou matutua.
O le mea moni, e leai se aoga o lou iloa, pe a le faia. E leai se aoga o lou faalogo pea i le upu a le Atua, ae e te le savali ai.
O loo folafola foi le afioga a le Atua, o le tagata poto e faalogo ma fai, a o le tagata e faalogo ae le faia, ua faatusaina o ia i le tagata valea, ma ua faaseseina lava o ia.
1 Ioane 2:9, ‘O lē fai mai e alofa i le Atua ae ita i lona uso o loo i le pouliuli lava ia.’ 1 Ioane 4:20, ‘Afai e faapea mai se tasi e alofa i le Atua ae inoino i lona uso o le pepelo lava ia.’
O se mea na matua aoaoina ai au e le Atua, ona o le tele lava o taimi, faapea lava au ua lelei mea uma. Ua uma ona tuuina lou ola i le Atua, ua ou tau atu foi ou te alofa ia te ia.
Ae i lea foi lava taimi, e ese lou ita i lou lava uso.
Sa ou le faamagalo foi i ou lava uso i mea na matou eseese ai. O lou lava manatu e le afaina tele lea tulaga, o le mea sili o loo lelei lou faiā ma le Atua.
Ae talofa e ia te au, sa matua faaseseina lava au. Ina ua sulugia au e le malamalama o Ieova e ala i lana upu, na faapupulaina ou mata faaleagaga ma ou iloa ai, o au lava o le tagata pepelo, o loo faaapena foi ona ou ola pea i le pouliuli.
Ua leai foi se amiotonu ia te au. Ae faafetai i le Atua, aua o le mea lea na faaali mai ai o ia, ina ia faaumatia galuega a le tiapolo.
O se tasi lenei o ana galuega, o le faaseseina o le fanau a le Atua.
Samoa e lou atunuu pele, o lenei vaitaimi o loo tatou iai, e le o toe faigofie. O loo lutia pea i tatou i fita ma faigata o le olaga nei, ma ua fesouaina pea i tatou i afa o le olaga nei, ae tatou loto tetele, o Iesu lava na fetalai, ‘Afai e sau le fili faapei o le galulolo, o au lava o le Atua ou te siitia le faavae.’
Poo le a le ituaiga o faafitauli o loo fetaiai ma oe i lenei vaitau, taulai pea lau vaai ia Iesu, aua nei faaseseina i tatou, o le Atua o loo tatou auauna i ai, o le Atua silisili ese lava ia, e le o se tagata foi e pepelo ai. E le vave pe tuai mai o ia, ae afio mai lava i lona taimi talafeagai ai.
Manuia tele lenei vaiaso Samoa!
