Aua le Faaaogāina lou Igoa ma Faamaoniga o lau Galuega ma lou Totogi, e Fesoasoani ai e Faatau se Fale o se Isi o lou Aiga, a o lei Faia Muamua se Feagaiga Tusitusia ma lea Tagata e ona le Fale Faatau, e Faama‘oti ai lau Aiā i le Fale, ma ou Tiute pe a Lē Totogia e le Tagata lea e Ona le Fale, le Mokesi

Ona ua tele tagata ua susulu mai i faafitauli e pei ona ta‘ua i luga, ua laga ai le manatu, e tatau ona faalauaitele atu se fesoasoani i le pepa, i tulaga e tatau ona fai. E tele tagata e o i le Bank pe a fia faatau se fale, e saili se mokesi mo le tupe e faatau ai le fale.

E o i le Bank ona vaai lea o le Bank pe lava le tupe i masina taitasi e totogi ai le mokesi. A lē lava le totogi o le tagata, poo se ulugalii lea e fia faatau se fale, ona fai lea i ai o le Bank e lē mafai se mokesi ona e lē lava le tupe e totogi ai le loan a le Bank. Ona omai lea ua fai i nisi o aiga o faigaluega, e faamolemole, e na ona avatu lava o le igoa ma le “payslip” se‘i ave i le Bank e lagolago ai le aumaia i tua o le mokesi.

O le Tulaga e Tatau ona Nofouta i ai le Tagata lea e Faaaogā le Igoa, e faapea e na ona fai ai o le Mokesi:
E ave loa lou igoa e tuu i luga o se mokesi, e tusa pe faapea e leai sau tupe e alu ai e totogi ai le mokesi lea, e tele ou tiute i le tulafono ma e iai foi au aiā e tatau ona puipui:
A faaletonu le totogiina o le mokesi e le tagata lea na faaaogāina lou igoa mo le mokesi sa faatau ai le fale, e iai le aiā a le Bank i le tulafono e su ai oe ma tagata uma o loo iai igoa i luga o le mokesi.

O le tele o fale ua lē mafai ona totogi mokesi, e toe faatau atu e le Bank le fale i se (mortgagee sale). A lē lava le tupe e maua mai e le Bank mai le toe faatauina o le fale (mortgagee sale), e lavevea uma lava tagata o iai igoa i luga o le mokesi, pe a ave se tagi a le Bank i le Court, e totogi atu le paleni o le mokesi; le tupe na nono ma le pasene a le Bank, e lē o mauaina uma i le faatauina o le fale i le mortgagee sale.

O le isi mea lea e tupu mai, e tele ina lē ta‘uina e le tagata lea na faaaogāina igoa o isi, o aiga, e fai ai le loan muamua i le Bank, ae ua faaaogā le fale e fai ai isi loans. E afaina lava oe lea e iai lou igoa i le mokesi, e tusa pe e te lē o nofo ai i le fale, e tusa foi pe lē o alu sau tupe e totogi ai le mokesi, e tusa foi pe faapea e te lei iloaina le faiga o nei loans, e tāua.

I le Faaaogāina o lou Igoa e fai ai le Mokesi, e iai lau Aiā i se Tupe mai le Fale, e tusa pe lei alu sau Tupe e Totogi ai le Mokesi, e tusa foi pe e te lei Nofo ai i le Fale:

A faaaogā lou igoa ma lau galuega ma au pay slips i le faiga o se loan a se isi o sou aiga e fai ai se fale, e iai lau aiātatau i le tulafono e maua ai sau tupe, e tusa pe e te lei nofo i le fale lea, e tusa foi pe e te lei totogia le mokesi.

E iai lau aiā i se tupe mai i le fale lea ua ave ai lou igoa i le mokesi e tusa pe e te lē o nofo i le fale, e tusa foi pe e te lē o totogiina le mokesi.

O lau aiā i le tulafono e te tausisi i ai, e mafua mai lea i tulaga e lua: (1) o le faaaogāina o lou igoa, ma lau payslip e tatau ona totogi tupe (2) a ave lou igoa i luga o le mokesi, ua e aveina ai ma tiute tauave (risk) e ono ta‘uvalea ai oe, ma e solitulafono ai, pe iu ai ina e Bankrupt, pe a lē totogiina le mokesi.

Le Fautuaga:
Aua le toe faia faaaiga, ma fai i luga o le masani vaega ia e ta‘ua i luga. A o lei faaaogāina igoa o aiga, poo fanau poo uo, e fai ai mokesi e faatau ai fale, muamua saili se fesoasoani i le tulafono e tusi i lalo se feagaiga tusitusia e saini ai tagata e aafia.

O lea feagaiga e tusia uma ai vaega ia e ta‘ua i luga. A o lei faia lea feagaiga e tatau ona talanoa itu e lua poo ai e totogiina le mokesi; o ai e nofo i le fale; o le ā se tupe e malilie i ai itu e lua e maua e le tagata lea e iai le igoa i le mokesi, ae lē nofo i le fale, pe a faatau le fale.

E tatau ona talanoaina ma puipuia i lea feagaiga se tulaga pe afai ae oo i se taimi ua mafai ai e le tagata lea e nofo i le fale ona totogi le fale, ma ua lava foi le tau alu i luga o le fale (EQUITY) e tatau ai loa ona ave ese le igoa o oe lea na ave lou igoa e fesoasoani e fai ai le mokesi muamua.
Aua ne‘i galo e tatau ona totogi ma maua se tupe a le tagata lea na faaaogā le igoa i le faiga o le mokesi muamua, na mafai ai ona faatau le fale.

Aua le na ona aveese o le igoa ae ave uma e le tagata na faaaogāina le igoa, le tupe maua i le (EQUITY) o le fale. Ia tusia i le feagaiga se fuaiupu e puipui ai lea vaega, a o lei aveina lou igoa e faaaogā, e fai ai se loan e faatau ai se fale. Ia tusia i se feagaiga, ia faasā ona fai ni loans faaopoopo e faaaogā ai le fale, lea e iai le igoa o oe lea na faaaogā i le loan muamua, e secure ai nisi loans a le tagata lea na faaaogāina lou igoa e fai ai le loan muamua, ae aunoa ma le ta‘uina atu ia te oe. E iai lau aiā e tatau ai ona logo oe, aua e te tauaveina le (RISK), lea e ta‘ua i luga, i le ave o lou igoa i luga o le loan muamua.

Ia Muamua Faia se Feagaiga Tusitusia ma Sainia, a o lei Aveina lou Igoa e Faalava ai se Loan e fai ai se Fale a se Isi o lou Aiga
E laitiiti mamao le tupe e alu i le puipuiina o lau aiā tatau, ma ia e malamalama i le tiute tauave faaletulafono, a o e lei alu e ave lou igoa e faaaogā e le Bank.

E taugata tele le aveina o tagi i le fale faamasino. Fai auala tatau i le amataga, e taugofie, ma leai ni misa a aiga e maua ai mulimuli, talu le faatamala. Tautuana, e lautele ma tele vaega eseese e faasino i lenei mataupu, ae na ona otooto atu o ni vaega tāua, e ofi i le column, mo le tou silafia.