Ole taulealea lenei e suafa ia Vaisuamumu Leiataua, 24 tausaga le matua mai le afioaga o Manono uta, ua ia faamatala ai ona lagona ma le mautinoa, atonu e lē ole taimi lenei e finagalo le Atua e maliu ai.
Ua mafua ona laga se leo o Leiataua ona ole faalavelave lea na tulai mai ile Aso Toonai na tea nei ile lavea ai ose pasi la’upasese mai Manono mai le falepasi ale Tepatasi.
O Vaisuamumu Leiataua e lei leva ona avea ai ma se tasi o tagata faigaluega ale TV1 Samoa i Mulinuu, ma i lana saunoga ile itulau ole Talanoa mai Samoa, ole pasi lea na aafia ile faalavelave i Puipaa e masani lava ona ia malaga ai i Aso Toonai taitasi pe a manava, lea e alu ese atu mai le taulaga o Apia ile 2pm i aoauli o Aso Toonai taitasi ona e fetaui tonu ma le taimi e mānava ai i Aso Toonai ile 12pm ile aoauli.
Peitai ole po ole Aso Faraile 26 o Ianuari a’o lumanai ai le Aso Toonai na tula’i mai ai le faalavelave, na faatonu ai o ia e lona tina ina ia vave mai ile fale e fesoasoani ile tuiina o teu ole falesa mo sauniga ole Aso Sa.
Na usitaia e Vaisuamumu le faatonuga a si ona tina ia Segia Leiataua lea na mafua ai ona topetope ana galuega ile Aso Toonai ae tulituli ai le pasi ole 12pm ile aoauli ole Aso Toonai ma le lilo i ona manatu e tulai mai se faalavelave ile pasi lea e masani ona malaga ai.
Fai mai Vaisuamumu, e lei taunuu le faigamalaga ale latou pasi ae logotala le latou pasese i telefoni feaveai ile faalavelave ua tupu mai ile pasi ole 2pm ile aoauli. Na mate uma le aiga o Vaisuamumu, oloo aafia ai o ia i lenei faalavelave, ma avea ose popolega tele isi ona tina i lea aso.
Na oo i luga ole facebook le faasalalauina e lona tuafafine ole manaomia ose fesoasoani mo se faamatalaga e uiga ia te ia, ae ose tasi talavou na malaga faatasi ma Vaisuamumu ile pasi ole 12pm ile aoauli na ia vave tali ane i luga ole facebook ma ta’ua ai oloo la malaga faatasi ma Vaisuamumu ile pasi ole 12pm, ma oloo saogalemu vaega uma.
Ta’ua e Vaisuamumu, e taunuu atu le pasi i lo latou aiga i Manono, o laulaututu mai lona tina ma le latou aiga i luma ole auala e faatali mai le taunuu atu ole faiga malaga. Ole mau a Vaisuamumu Leiataua, o lona usitaia ole faatonuga asi ona tina ua mafua ai ona saogalemu lona ola, ia faatasi ai ma lona mautinoa atonu e lē ole taimi lenei e finagalo le Atua e uma ai si ona ola pe ana faapea e taunuu ona alu pea ile pasi ole 2pm ile aoauli.
Ole faalavelave lenei e pei ona silafia na maliliu ai nisi e toatolu ma le toatele ole pasese na faamanu’alia. O i latou e toatolu na maliliu e aofia ai si tina matua mai le afioaga o Faleu i Manono tai, ole alii avepasi, ma se tasi o tina na faatoa maua ile aoauli ole Aso Gafua na tea nei lona aiga, lea e faigaluega ise tasi o kamupani i Apia.
Ole Aso Lulu ole vaiaso lenei ua fuafua e ave ai i tua le tino maliu ole alii avepasi le susuga ia Meafou Lafoga ma le faamoemoe e faia ai ona toe sauniga ile Aso Tofi nei ma lagomau ai isi ona aiga i Apolima Uta.
Ole tulai mai ai o lenei faalavelave ua toe lagalagā ai manatu ole toatele ile tatau lea ona faasā loa ona toe faaaogā pasi laupapa mo femalagaa’iga ale atunuu. Ae i faamaumauga lava ia ale kamupani ole Asco Motors na o latou aumaia pasi laupapa nei i totonu ole atunuu, na ta’ua ai e Vaoga Lipa Vaoga, ole tausaga e 1999, na faasā ai e le malo ona toe aumaia i totonu ole atunuu pasi laupapa nei ma e oo mai lava ile taimi lenei oloo tumau pea le sa, se’i vaganā ai totoga poo parts oloo faaauau pea ona fesoasoani ai le Asco Motors ile aumaia lea mo le mamalu ole aufaipasi laupapa.
Peitai na molimauina i suesuega ale Talanoa mai Samoa, o nisi o pasi laupapa o iai pea ile taimi lenei, na fausia mai ini loli la’u uta, lea ua mafai ona fausia ai le fausaga o pasi laupapa e pei ona faaaogā ai ele atunuu lautele mo femalagaa’iga.
