Ua faamautu mai i se pepa o faamatalaga a le aoga tulagalua maualuga, le Kowhai Intermediate i Kingsland i Aukilani, le sauni atu i le tausaga fou, 2011, o le a amata ai ona a‘oa‘oina atoatoa le mataupu mo le gagana Samoa a le fanau i nisi o vasega (Year 7 & Year 8).
O lenei faaiuga, o se tali atu i le manaoga ua leva ona faatalosaga ai le toatele o mātua Samoa, a o a‘oa‘oina lenei mataupu i se faiga sa faa‘afa‘afa ona fai, mai le lua tausaga ua mavae.
O Kowhai, o le uluai Intermediate School i le faaitu o Aukilani Tutotonu ma Aukilani i Sisifo, na latou faaaofia le gagana Samoa i mataupu sa a‘oa‘oina a le fanau aoga, e ui e lei sosoo ona fai i aso uma e pei o le a‘oa‘oina o isi mataupu. O se suiga lenei ua nofo tatali uma i ai mātua Samoa aemaise le fanau, ina ia aulia atu le tausaga fou i se ola ma se malosi, ae se‘i amata loa. Ua tuuina mai ai foi ma se faasilasilaga i mātua ma i latou o tausia fanau (caregivers), ua tatau ona agai atu e lesitala suafa o fanau o le a ulufale i le Year 7 poo le Year 8, o ē mananao e auai i le vasega o le a a‘oa‘o ai le gagana Samoa.
O le alii pule o le aoga, Paul Douglas o loo faafesootai i ai le lesitalaina o igoa o le fanau poo soo se faamatalaga e fia silafia atili. E maua le susuga Douglas i le telefoni: (09) 846-7534 poo le imeli: pauldouglas@kowhai.school.nz.
Ua saili nei foi e le Kowhai Intermediate se faiaoga e galue faasoloatoa ai i lena vasega fou (fulltime qualified bilingual Samoan/English teacher) i le tausaga fou, 2011.
E mafai foi ona faia ni fetuunaiga mo ni faiaoga se toalua e vaelua i le faatinoga o lea avanoa, e mafai ona 2-3 aso o le vaiaso e faigaluega ai se tasi i le a‘oa‘oina o fanau i le gagana Samoa, pe a faafesootai atu le alii pule.
O nisi faamatalaga i lenei aoga o loo maua i le latou upega o fesootaiga, www.kowhai.school.nz, pe asia le latou itulau i le Facebook ua faaigoa, o le ‘Vasega Samoa i Kowhai’.
