O le Cocoa Flavaz o le pisinisi e faafuna ai ao (fale ‘oti ulu), ta ai foi tatau poo pe‘a i mamanu Samoa ma mamanu faaonaponei, atoa ai foi ma le lolomiina ma faatau atu mitiafu.
O le Aso Toonai la na tea nei, aso 3 o Novema, na faamanatuina ai le tasi tausaga o le tautua matavela a le susuga ia Vio ma lona faletua mo le mamalu o Samoa o alaala ma papaaao i Melepone.
I le sefulu ma le lua masina ua mavae, na maitauina e mafuli lava i le tupulaga i latou e fiafia e afea le Cocoa Flavaz, ai ona o le agavaa o le taleni ua foaiina e le Atua i aao o lenei alo o le atunuu.
O le Aso Fanau faamanatuina i le Aso Toonai, na molimauina le lagolago malosi e le paia lasilasi o Samoa, i le mamalu na afifio atu e faafuna o latou ao.
Sa maua le faamalositino i le sosisi papakiu sa taumafa fua, o le faaaloalo lea a le auaunaga e faaali ai lo latou agaga faafetai ia Samoa, aemaise o ana paaga ma ana uo i lo latou lagolago ma le fesoasoani i le tausaga atoa, ua aulia ai ma le manuia le tasi tausaga o le tautua.
Faaalia e le susuga a Vio, o lona naunautaiga ina ia umi pea lona soifua ma tumau pea lona malosi, e faaauau ai pea ona tautuaina le mamalu o Samoa o nopiai i Melepone i lana taleni ma le meaalofa ua foai e le matai sili, ma ia saga aulia ai pea nisi tausaga se tele o le tautua a le Cocoa Flavaz.
Na faaiuina le aso faamanatu i le fiafia (siva) tele sa faia i le po lava o le Aso Toonai lea na faatumulia ai se tasi o nofoaga mo faafiafiaga, ona e lē gata i le taupati atu o le atunuu e lagolago le aso fanau, ae o le taupati atu foi e fia maua le tele o faailoga sa ofoina i lea po, aemaise ai lava le faailoga muamua o le se‘i, o le manumalo o le malaga fua i Niu Sila ma toe foi mai.
Ia amuia lea tamalii na faamanuiaina atoa foi ma i latou uma na maua faailoga i le aso fanau o le Cocoa Flavaz. Manuia ou laasaga uma Cocoa Flavaz, ia faamanuia le Atua.
