E ese foi lagona o le toatele i polokalame o le tutoatasi o le atunuu sa faailoga ma faamanatu i le Aso Toonai na tea nei. O nisi e manatu ua le toe maua lava tausaga amata o le faamanatuina o le tutoatasi o le atunuu, ona ua le toe tutusa le tapenaina o polokalame.
E ui lava o loo tumau le sauniga masani o le sisiina o le fu’a ma malele le Ao o le Malo sosoo ai ma savali faaaloalo a aoga, ma faalapotopotoga lea ua auai ma nisi o matagaluega a le Malo, ae o le aoao tetele o polokalame ua lē o toe faaosofia ai lagona o le fia auai o nisi e molimauina le aso fiafia o Samoa. Ua faaopoopo la iai ma televise ua latou faasalalau sauniga uma ua atili le toe vaaia ai le tumutumu sa iai le taulaga o Apia i aso o le sisigafu’a.
Sa masani lava o tolu aso e faasolo ai polokalame faafiafia eseese, peitai na oo i nisi tausaga ua lua aso ae tolu i le aso malolo e leai ni sauniga. O nisi tausaga ua tasi le aso sosoo ai ma le aso malolo. E faapena le tausaga nei ua pa’u tonu i le Aso Toonai le aso muamua o Iuni ma ua faamanatu ai ae e lē o se aso malolo sa tatala lava faleoloa ma isi galuega e pei ona masani ai. O le Aso Gafua o le vaiaso na faatoa faia ai le aso malolo mo tagata uma. Na faaalia e le Palemia susuga Tuilaepa L Sailele Malielegaoi, e iai nisi sa mananao e tuu le faailogaina o le tutoatasi o le 2019 i le amataga o le vaiaso nei ona o le faaiuga o le vaiaso na pa’u iai le aso muamua o Iuni, peitai sa faaalia e Tuilaepa o le taitaifono o le komiti o le tutoatasi, ua manatu le Malo e sili pea ona faamanatu ile Aso Toonai. Sa iai foi faitioga a nisi o le au faipisinisi na oo i le malo ona ua tele aso malolo ma ua faaletonu ai tupe maua aemaise a malolo tagata faigaluega e totogi lava.
O le malelega faamanuia a le afioga i le Ao o le Malo, Tuimalealiifano Vaaleto’a Sualauvi II sa toe faamanatu ai ile atunuu le taua o le tutumau o tagata uma i le ola faakerisiano. O lana malelega foi na ia afea ai nisi o galuega ma atina’e tetele a le Malo ua faatino mo le manuia o le tamaoaiga o le atunuu.
“O lea ua siitia maualuga le tulaga i atina’e tetele e pei ona tatalaina aloaia ai nei auala savali aga’i i vaalele o le malae vaalele i Faleolo ma le Tui Samoa Cable, ma o ni matati’a maoa’e ia mo si o tatou atunuu o Samoa. O le faamoemoe foi ina ia siitia maualuga le matagofie o foliga vaaia o le taulaga i Apia, ua le o toe mamao ona tino mai lea e ala i le atina’e o le faamatagofieina o le taulaga. O lea foi sa mafai ona faatinoina le lauliliuina o le tala faatatau o le tupe a lo tatou malo i le maota fou o le Palemene ma le anoanoa’i lava o isi mau atina’e o galuega o loo faaauauina pea.
O vaega ia, e ao ai lava ona momoli le agaga o le faafetai i le fesoasoani mai o a tatou paaga masani, faapei o Ausetalia, Saina, Iapani, Niu Sila, le Iunaitesetete o Amerika, Faletupe o Atina’e a Asia, Faletupe a le Lalolagi, o Malo Aufaatasi, OPEC, UAE, atunuu o le Iuni a Europa ma i latou uma o loo tofu sao ma o loo galulue punoai pea i soo se matata ina ia faateletelevavave le faatinoina o nei atina’e e aofia ai faalapotopotoga o lenei itulagi”.
O le Malelega faamanuia a le afioga i le Ao o le Malo ;
Lau Susuga le Faafeagaiga Faulalo Leti – Taitai o le Sauniga
Lau afioga i le Sui o le Fono a Sui Tofia ma le Masiofo
Lau afioga i le Alii Palemia ma le Kapeneta, ma Minisita Lagolago
Lau afioga i le Faamasino Sili ma le Vasega o le Faamasinoga
Lau afioga i le Fofoga Fetalai ma Sui Mamalu o le Palemene
Faauluululuga o Matagaluega ma Pisinisi Tumaoti
Sui o Malo Mai Fafo
Lau afioga i le Alii Palemia o le Malo o Tuvalu, Rt Hon. Enele Sosene Sopoaga &Your Good Lady
Lau afioga i le Lutena Kovana o le Malo o Amerika Samoa: Lau Afioga Lemanu Peleti Mauga
Lau afioga i le Ulu o Toelau: Hon. Kelihiano Kalolo & Your Good Lady
Le Paia o le Aufaigaluega a leAtua i soo se tafa o Samoa
Le Paia o Samoa ua potopoto i Aiga ma Tama, o Tama ma Aiga, Tumua ma Pule, Ituau ma Alataua, Aiga i le Tai ma le Vaa o Fonoti. Sua ma le Vaifanua, Fofo ma Aitulagi, Sa’ole ma le Launiu Saelua, Afifio Faatui ma Tootoo, ma upu i le Manuatele.
O loo ua matatupu ma tagai i measina le asō. O lenei ua tatou ‘oa’oa i le malutauifo ma le lagisisili o le Atua o Sapaota. Ua tatou sasagiola ma tafililētutaia i le apilolo’u ma le vaosā o le Atua Foafoa.Ua tatou sapisapi ma o tatou fetaasaua’i i sōliga fesiitai ma ē’ega malu o le Atua Silisili Ese.O Ia o le Atua o le Ola, ua ta’elegāmaa ma toopapa i ai le Malo Tutoatasi o Samoa.Aua “E FAAVAE I LE ATUA SAMOA.”
“O le aso lenei ua faia e le Alii, ia tatou te olioli ma fiafia iai.” I le oso a’e o le la o lenei aso fou, i le faamanatuina ai o le 57 tausaga o lo tatou malo tutoatasi, ua alagatatau ai ona o tatou muai ave le faamua i le Atua, o le viiga ma le faaneetaga ona o le tamaoaiga o lona alofa tunoa, ma lona alofa mutimutivale ia Samoa. I lenei lava vaiaso, sa tatou molimauina ai le sainia ai lea e Samoa o le feagaiga ma lo tatou Atua lea e faavae ai, ma toe faamautuina ai la tatou tautinoga ia te ia. Oute talitonu ma le faamaoni, o lea ua tatou iai nei i le amataga o se faafouga faaleagaga mo Samoa.
Oute faatalofa atu ai i le afifio o le paia maualuga o a tatou malo faaaloalogia mai le Pasefika, ae le gata ai i lea o a tatou paaga masani, o le mamalu lautele o le atunuu, o uo ma aumeamamae, faapea alo ma fanau ua mafai ona auai mai i lenei taeao aua le faamanatuina o lo tatou tutoatasi. E faatalofa atu foi i le paia o matua ma matua tausi o loo faafofoga tapuai mai i maota ma laoa, ae le gata ai i lea o le paia maualuga o Samoa o loo alala ma papa aao i soo se tafa o le lalolagi o loo mafai ona maimoa mai i lenei sauniga mamalu e ala i fesootaiga televavave.
Ou te fiafia foi e faafeiloaʻi atu i taitai uma o Ekalesia eseese faapea le aufaigaluega Paia a le Atua; Ae le gata ai i lea o taitai ma sui o le Malo e ala i lana Palemene, le Faamasinoga, ma le Pulega Faatonu, o faalapotopotoga ma matagaluega; le pulega mamalu a alii ma faipule faapea nuu ma afioaga, o le aufaipisinisi, le aufaasalalau ma faalapotopotoga eseese aemaise tagatanuu uma o Samoa.
Mo soo se Samoa lava, o loo tapuai mai i maota ma laoa, poo atunuu e mamao, o le aso muamua lenei o Iuni, o se aso tāua tele lea mo lo tatou atunuu.
O le aso e faamanatuina ai lo tatou saolotoga. E agiagiaai ma le faagaeetia la tatou tagavai i falefaigaluega, o aoga, o maota ma laoa o aiga faapea tuaoi,ma o se faailoga lea o lo tatou mitamitaga, i lo tatou atunuu o Samoa. O se faailoilo foi e faamanatu mai ai pea ia i tatou la tatou sailiga malo ma lo tatou talitonuga ia tei tatou lava.
O se aso foi e tatou te toe tomanatu ai i futia ua sola ma le agaga faafetai atoa ai ma le loto ua faamalieina i mea uma ua mafai ona ausia ona o le sailiga malo a o tatou tuaa.
O se aso foi e toe tapue atili ai a tatou faaiuga fai ina ia mafai ai ona faaoga tatau avanoa o loo maua pea mo le atina’eina o le atunuu –o avanoa e tatou te faamoemoe i a tatou tupulaga talavou e latou te faaogaina ma le tatau e ala i la tatou lagolagosua.
E faafetaia foi le Tapaau Sili oi le lagi ona o mea silisili ma le tāua sa mafai ona ausiaina i totonu o le sefululua masina ua tuanai nei. O lea ua siitia maualuga le tulaga i atina’e tetele e pei ona tatalaina aloaia ai nei auala savali aga’i i vaalele o le malae vaalele i Faleolo ma le Tui Samoa Cable, ma o ni matati’a maoa’e ia mo si o tatou atunuu o Samoa. O le faamoemoe foi ina ia siitia maualuga le matagofie o foliga vaaia o le taulaga i Apia, ua le o toe mamao ona tino mai lea e ala i le atina’e o le faamatagofieina o le taulaga.
O lea foi samafai ona faatinoina le lauliliuina o le tala faatatau o le tupe a lo tatou malo i le maota fou o le Palemene ma le anoanoa’i lava o isi mau atina’e o galuega o loo faaauauina pea.
O vaega ia, e ao ai lava ona momoli le agaga o le faafetai i le fesoasoani mai o a tatou paaga masani, faapei o Ausetalia, Saina, Iapani, Niu Sila, le Iunaitesetete o Amerika, Faletupe o Atina’e a Asia, Faletupe a le Lalolagi, o Malo Aufaatasi, OPEC, UAE, atunuu o le Iuni a Europa ma i latou uma o loo tofu sao ma o loo galulue punoai pea i soo se matata ina ia faateletelevavave le faatinoina o nei atina’e e aofia ai faalapotopotoga o lenei itulagi.
Oute fia faailoa atu foi nisi o molimau, ma o ata vaaia ia o le sao tāua o le mamalu lautele o le atunuu i le unaia pea o atina’e gafataulimaina.
O loo feagai nei le aufaifaatoaga ma le aufaifaiva ma le totoina faapea le sailia o mea taumafa mo le mamalu lautele o le atunuu, atoa ai ma le faamautinoaina lea o le saogalemu o nei mea taumafa faapea ai foi mea taumafa talafeagai ma le maloloina mo a tatou fanau.
O lo ua iai foi le faanaunautaiga ina ia toe faaolaola a tatou oloa auina atu i fafo. O loo fesoasoani foi i le aufaifaatoaga i le tuuina atu lea o avanoa faatekonolosi atoa ai ma nofoaga e faaleleia ai oloa gaosi faapea tulaga i tupe maua.
O loo feagai foi le matagaluega o leoleo ma le anoanoai o luitau eseese i le faafoeina o tulafonoma le tau foia o soligatulafono ina ia mautinoa o loo saogalemu ma malu puipuia lo tatou atunuu, faapea lo latou sao i le tausiga o le filemu i atunuu o le lalolagi o loo tulai mai ai pea taua ma fevesia’iga.
O loo ave pea foi le lagolago iai latou, e ala i le faaleleia o la latou auaunaga faapea le siitia o o latou tomai ma agavaa.
E iai foi matafaioi tāua a tamaitai i totonu o le lio o loo outou soifua ma o tatou ola ai ma e ao ai lava ona tutusa lo latou avanoa ma lo latou saogalemu e faataunuu ai o latou tiute ma tomai. E tatau ai lava i lo tatou malo ma le atunuu, ona faamautinoaina ua aloaia a latou aia tatau ma mafai ai ona faatino a latou lava filifiliga.
O ā tatou tupulaga talavou, i alii ma tamaitai, o le lumanai manuia lea o lo tatou atunuu mo a taeao.E ao ai lava ona tatou unaia le atina’eina o agavaa ma le tamaoaiga e le faʻatapulaaina o loo iā tatou tupulaga talavou, e ala i le tapueina o tomai i aoaoga ma avanoa sikolasipi; i le faatekonolosi, inisinia ma faapisinisi; mo le fatufugaga ma galuega taulima; mo le fatuina o musika ma le fausia o masini feaveaʻi, faapea o lo latou tomai i taʻaloga. Ae le gata ai i lea, e manaʻomia foi ona tatou faia ni ‘galuega lelei’ i totonu o le atunuʻu ma faʻaaoga tatau avanoa e ofoina atu e lo tatou malo e ala i galuega faavaitaimi i atunuu i fafo.
E fia faailoa foi le agaga o le faafetai i le sao tāua o ā tatou faalapotopotoga ma pisinisi tumaoti i le atina’eina o lō tatou atunuu, aemaise lava i le atina’eina o pisinisi laiti aua o le malosiaga lea o lo tatou tamaoaiga.E faapena foi i auaunaga a faalapotopotoga ma matagaluega a le malo. O le upu moni ana le seanoa lo outou mataalia i le tauaveina o la outou pitolaau, ma le faatinoina o lo outou tomai ma agavaa, iamanino ma le atoatoa galuega fai, semanu e faigata i le malo ona tauave la latou foi pitolaau.
Ua tatou iai nei i le vaitau e ao ai ona tatou tepa taulai i le tapueina o le malosiaga e mafai ai ona o tatou tali atu i aafiaga matuiā o le suiga o le tau, o faalavelave faalenatura e pei ona aafia gofie ai si o tatou atunuu o Samoa, o se motu laititi tau atia’e.
Ua tuuina atu le tatou faamuamua i le faatinoga o gaioiga e foia ai tulaga lamatia ua iai nei, ma gaioiga talafeagai e tali atu ai i suiga o le tau ma mataupu e pei o polokalame mo le faaleleia atili o le malosiaga tatou te tali atu ai i ia faafitauli.
E ui lava i nei luitau uma, ae o loo faaauau pea ona faatino la tatou matafaioi e ala i le unaia malosi ma le faʻalauteleina o auala e foia ai nei faafitauli mo lenei itulagi ma le lalolagi atoa,e pei ona atagia i le fonotaga talu ai nei a taitai o le Pasefika ma le Failautusi Aoao o Malo Aufaatasi lea sa tauaofia i Fiti i le ogatotonu o le masina o Me.
O le tatou talimalo ai i Taaloga o le Pasefika i le masina o le a sosoo ai nei, o fonotaga e tolu faaMinisita i le afa mulimuli o lenei tausaga 2019, aemaise ai o le faamaonia talu ai nei o le sainia ai o le feagaiga o le Post Cotonou ACP-EU i Apia i le tausaga fou, o faʻataʻitaʻiga ia o lo tatou sao tāua e ala ilo tatou auai i fonotaga ma faatalanoaga faʻaitulagi nei aemaise ai o le lalolagi atoa.
E pei ona taʻua i le afioga Paia a le Atua i le tusi Teuteronome 28 “o se atunuu e mataʻu i le Atua, e usiusitai ma faalogo i ana poloaiga, o le a matuā faamanuiaina le aai ma le nuu, ma o fua foi o lona laueleele o le a faateteleina, aua o le a tatalaina e le Atua le lagi, o le faleteuoloa o lona manuia, ma auina ifo uaga i luga o lona laueleele i ona vaitau, ma faamanuiaina ai galuega uma a ona tagatanuu. “
Samoa e, e ui lava ina eseese o tatou manatu ma talitonuga, ae sei o tatou o maia faatasi ma le lotogatasi, e faaauau ona folafola atu le Silisili Ese ma le Pule Aoao a le Atua, aermaise o le faaKerisiano o le faavae papa lea o lo tatou atunuu.
O lo tatou maluapapa foi lea e manuia ai le lumanai o Samoa. Ia tau ia ina ia tatala e le Atua pupuni o le lagi, ae faatotō ifo faaua ona manuia i luga o Samoa atoa, aemaise o lana Faigamalo.
Ia saga faamanuia le Atua ia i tatou uma lava i le faamanatuina o le 57 tausaga o le Malo Tutoatasi o Samoa.
Soifua.
