E ese foi auala ua maua ai le ‘ata i Samoa
O le faagasologa o lenei tausaga i galuega masani aemaise le feagai ai o aiga i Samoa ma le tiute masani o le galue ma sailiga o le seleni mo aiga, e laitiiti lava se taimi ua maua ai se avanoa e malolo teisi ane ai ae se‘i fai sina ‘ata ma se‘i tuu i luga aao latou ae to le sela.
Ae o le tele o kamupani ua fai faalauiloa ua maua ai le avanoa a le toatele o le mamalu o le atunuu e uu ai sina tupe lapoa mo sina taimi ma ‘ata sa‘o loa.
O vaaiga nei i itu eseese o le atunuu ua molimauina le manumalo ai o nisi i faalauiloa a le mau kamupani aemaise le kamupani a le Digicel lea ua ia fai se isi foi taumafaiga e saga faalauiloa ai ana auaunaga ia e faaaogā i aso uma o le faaopoopo o le tupe e fafaga ai le telefoni feaveai. O soo se tasi e faia lea tulaga e ono maua le avanoa lea e ta‘ua o le Faasoa atu foliga ‘ata‘ata poo le Share a Smile.
A e laki e eseese lava vaegatupe e te maua ma o le maualuga lava e manumalo ai le tagata i lea vaiaso ma lea vaiaso, o le $10,000. O le manumalo o le vaiaso na tea nei o le tamaitai o Fale Lelei, o se tina o le afioaga o Vaitele.
E pei lava ona amata ai nei faiga faalauiloa, na faapea lava Fale o le ta‘u atu o ia ua manumalo i se faailoga o le faasoa atu o le ‘ata ai e laitiiti le tupe o le a ia maua ae faateia i le oo atu i le Ofisa o le Digicel i Vaimea ae avatu le siaki e $10,000 – uma loa le ‘ata ae ua tau maligi mea taugata.
E tele tupe eseese e amata mai lava i le $500, $1000, $2,000 e oo lava i le $5,000 ua manumalo ai nisi o le atunuu i lenei faalauiloa ae na ta‘ua e le kamupani o Fale le tagata muamua ua oo i le $10,000 sona manumalo. Toe toalua e ono manumalo i le $10,000 aemaise isi faailoga e oo atu i le ta‘i $5,000 mo le masina o Iulai ma le masina o Aukuso.
Faaalia e le tamaitai o Fale o lana manumalo i le faaiuga o le vaiaso, o le a alu sa‘o lava i le fausia o se fale mo ia ma lona aiga.
I Vailele sa faapea foi ona faateia se tamā e suafa ia Pati Peteru i le oo atu o le sui o le Digicel Samoa i lona aiga ma tauaao atu se siaki e $3,000. Faaalia e lenei tamā o loo faagasolo le galuega o lona fale ma lona aiga i le taimi lenei ae o le vaiaso na tea nei na tuli ai lona afafine e faatau atu se card e fafaga ai lana telefoni ma e $5 na faaalu ai.
Ua te‘i i le toe foi atu o lona afafine ma le card ae alu atu ai upu nei, faasoa le ‘ata ma le $3,000. Ta‘ua e Pati le faafetai i lenei tamai taimi na maua ai lenei faamanuiaga ma o le a alu foi lenei seleni i le galuega o loo faagasolo nei o le latou fale ma lona aiga.
O le taaloga lenei o loo tatala i soo se tasi i Samoa nei o loo iai lana telefoni Digicel ma e faaauau seia mae‘a le masina o Aukuso.
