O Tofaeono Tanuvasa Tavale, o ia o se uluai Samoa, ua tauaaoina nei i ai, ma ua ia taulimaina le Pine Taualoa a le Tupu Tamaitai o Peretania, e faapitoa lava ona o le tulaga i le tele o lona sao i Tusi ma Tusitusiga sa ia fiafia e faatinoina.
E toatele nisi o tamalii ma tamafanau a Samoa, sa o latou muai tauaaoina lea lava Pine tāua, peitai e eseese lava vaega sa faapitoa i ai i o latou soifua tautua. O nisi, ona o le faatinoina o galuega Faamasino o le Filemu (JP), o isi ona o a latou lava galuega faapolofesa ma ausiga maualuluga sa latou ausia.
Peitai, o lenei tamalii o le atunuu, ua ia asoaina le Pine Taualoa, ona o lana galuega tusitusi mo le manuia o tupulaga i le itu tau aoaoga, ae o lona filiga foi e tusia le tele o Tusi, mo le lumanai o ona tagata i le tulaga o le gagana Samoa, o aganuu, ma tu masani e faailoa ai le faaaloalo ma measina a le atunuu, i le vaai mai fafo a nisi atunuu, lanu ma gagana.
O le faamanatuina o le aso malolo mo le Tupu Tamaitai o Peretania (Queens Birthday), i lenei tausaga 2012, na avea o se tasi o tupito, ma se aso tāua o le a faagalogata e le Afioga ia Tofaeono Tanuvasa. O se aso o le tauia, na faaulaina ai i se tasi o taui aupito i maualuga ma le taualoa i lona soifuaga tauivi ma le galue malosi.
O le Aso Gafua, aso 4 o Iuni 2012, na ia tauaaoina ai le Pine Taualoa mai le Tupu Tamaitai o Peretania, Kuini Elisapeta. O se faailoga ma se taui e le maua uma e tagata, ma e le faigofie foi ona maua ma uuina e soo se tagata tautua ma tagata galulue.
O Tofaeono Tanuvasa Tavale, e le toe tau faailoaina lana tautua, ma lona soifua galue mo tagata lautele. E le gata i totonu o le atunuu a o lei malaga i Niu Sila, e pei ona faamautu ma alala ai nei, peitai e faapea i totonu o Niu Sila.
O aoga sa galue ai o se Faiaoga, o Matagaluega a le Malo o Niu Sila o loo auauna ai, ae faapea foi lana Ekalesia e pei ona tautua ma ofoina ai lona soifua mo le Atua ma lana galuega.
Ua ia ausia foi se matatia tele, o le oo atu lea i le 20 Tusi mo le Gagana Samoa, o Tusi e uiga i Tu ma Aga a le atunuu, faatasi ai ma fesootaiga o Aganuu a Samoa ma le Talalelei.
O ia Tusi, ua faaauau ai lana galuega faafaiaoga e pei ona valaauina ai.
O lona uiga afai o le a le finagalo o le Atua i lona soifua i le olaga nei, ae o le a aoao mai pea, ma faaaogāina e le toatele o alo ma fanau a Samoa, Tusi sa ia tusia auā le Gagana, Tu ma Aganuu faasamoa. E le na o alo ma fanau lalovaoa a le atunuu, ae o le a faapea foi le toatele o matai, o le a fesoasoani tele i aga ma le gagana faamatai.
Aisea na filifilia ai Toafaeono Tanuvasa mo le tuuina i ai o le Pine Taualoa?
O se feiloaiga ma lana auauna i lona maota i Magele i le vaiaso na tea nei, sa ia faamaonia mai ai i le Samoa Times, ma Talafou a le Radio Samoa, le tulaga sa fesiligia ai ona o lona filifilia, ma lona tauaaoina ai o lea faailoga tāua tele.
Sa ta‘ua e Tauvasa e faapea, e tele vaega sa mafua ai ona filifilia lona tagata mo le tuuina i ai o le Pine a le Tupu Tamaitai.
O vaega taitasi e pei o le tele o Tusi sa ia tusia mo le fesoasoani i aoaoga. O Tusi, ma le faamaumauina o le gagana Samoa, i Tu ma Aganuu, ua penefiti ai le toatele o tagata Samoa lava ia, e le gata i tupulaga, ae faapea foi mmatai.
O vaega ma le faaofiina o le gagana Samoa i totonu o polokalame mo aoaoga i totonu o Niu Sila, ma ua avea ma gagana e lona tolu i ai gagana e faatāuaina i Niu Sila, i lona aoaoina ma le faatulagaina.
Sa avea o se Faiaoga i tausaga e tele ua mavae i Samoa, ma sa faaauau pea i Niu Sila e oo mai i le taimi nei. O le aoaoina o le gagana Samoa, o le tusia o Tusi mo le gagana Samoa, o galuega faatino i Matagaluega a le Malo e pei ona tautua ai pea, aemaise lona soifua ofoina mo le Atua i le Ekalesia.
O vaega taitasi uma ia na tuufaatasia, ma avea ai lona tagata, ua tatau ma onomea i ai le Pine Taualoa a le Tupu Tamaitai o Peretania e pei ona ia tauaaoina i le vaiaso na tea nei.
E lei mamao tele atu sa ia tauaaoina ai foi se tasi o Tusi Taualoa sa faamatuuina e le Komisi o Aia Tatau a Niu Sila, ona o mafuaaga e pei ona ta‘ua i luga.
O lea Tusi dPasi, sa faatauaina ai lona soifua galue ma le punouai, atoa ai ma le loto fiafia i le faatinoina o ona tiute tauave. E talitonu Toafeono, o le isi vaega lea sa tele so latou sao i le finauina o se avanoa, ma le Pine e pei ona ia manumaloina.
O le faalapotopotoga faaleaoaoga a le PIERCE, sa faiaoga ai mo le tele o tausaga ua mavae, e manatu Tanuvasa, sa latou finauina foi ma faaopopoina le molimauina o lona tagata, ua mafua ai lea filifiliga faigata ma le lē faigofie.
O se avanoa foi sa saunoa faafetai ai Toafaeono i le tapuaiga lautele a le atunuu, mai lava i le Aufaigaluega a le Atua i soo se Fatafaitaulaga, ae faapea foi le mamalu i Tupu ma Tamalii, o Faleupolu tofia, seia oo lava i maave eseese o le atunuu.
Sa ia saunoa o le galuega faifaatasi ma le tapuaiga a Samoa ma aiga faapea Ekalesia, ua manuia ma ausia ai lea foi ausiaga tāua ma le maualuga.
O se avanoa tāua foi e ave faatasi ai, ma toe faafoi le faamalo ma le faafetai tele i lenei tamalii o Samoa, ona o lona maemae, o lona tauivi ma le faamaoni, o le galue le fetepatepaai, faamalosi e aunoa ma le vaavaai i se taui, peitai sa tuli pea i luma lona ‘ai, seia oo ina pale ma tago atu i ai ma le fiafia.
O le faaea atunuu ma le sailimalo, ae ua maualuga ai le viiga o le Matai Sili i le Lagi. O lana molimau, sa iai le manatu i se tulaga faapea, auā o lona lava ia soifua, sa ofoina ma le atoatoa i le mafai sa ia mafaia, aua le tautuaina o le Atua faapea lona atunuu pele o Samoa.
