
Ole toto masaa ile alatele ma taatia ai mo se taimi umi, o foliga vaaia na sa molimauina e taavale na ui atu i Tuana’imato agai atu ile afega mo Aleisa ile faaiuga ole vaiaso. Talu se faalavelave foliga matuia na feto’ai ai le pasika ma le van pa’epa’e.
Na ta’ua ele Sooupu a leoleo, Susuga Auapaau Logoitino, “ole pasika na alu atu i tai e agai i uta, ma alu atu lava pasi taavale e lua, ae fetaui ai ma le Van Nissan oloo agai mai uta. Na fetoai le pasika ma le van ae lelea ese le ave pasika. Ua molia le ave pasika, ile saosaoa ma le ‘onā. Na faia suesuega ma iloa ai e ova le ‘onā ile faamatalaga ale sooupu a leoleo.”
“Na avatu le ave pasika ile falemai e togafiti, ma faatonu ai e tatau ona saini ile pito mo taavale afi ile ofisa o leoleo, e faatali ai le aso 6 Mati e tali i ona moliaga, ole avetaavale ‘onā, ma le avetaavale faatamala.”
E mulimuli mai le faalavelave lea, ae na tamua lava le faaiuga ole vaiaso i taavale lavevea i luma ole Aso Fitu i Lalovaea. Pei ona maitauina, ua lata i le 10 tausaga talu ona sui le itu auala ae iai lava avetaavale e sese le itu e oso ai iluga ole auala. Aemaise lava pe ‘a ‘ona, ae pe sau foi mai fafo e le masani ona avetaavale ile itu agavale. Ole alii avetaavale 49 tausaga le matua ua molia ile avetaavale ona, ma le faatamala. Ua tatala i tua, e faatali ai le taimi e valaau ai ile faamasinoga, ile aso 6 Mati. I totonu lava ole viaaso na te’a i Fugalei , na so’a ai i luma tonu lava ole maketi tuai a Toleafoa le tagata na kolosi. Ole avetaavale ose alii, ua 48 tausaga, ua molia ai nei ile avetaavale faatamala ua afua ai se manu’aga.
I Maluafou, na faamauina ai foi e leoleo le avetaavale ona, na ia soso’a i lana taavale se isi taavale nai luma. E oo lava ile taamilosaga ile uati, ua molia ai nei se alii 45 tausaga le matua, ile avetaavale faatamala, ina ua lē tuu avanoa na mafua ai ona fetoai taavale. Ua molia foi se tasi o alii, 46 tausaga le matua, ile faalavelave foi na tupu i Vaimea, ma molia ai ile avetaavale faatamala. Maitauina o avetaavale matutua lava lea oloo mafuli iai faalavelave tau taavale ile taulaga, pei ona tupu foi ile tama 43 tausaga i luma ole fale o Sefo Pa’u, ma molia ai ile avetaavale faatamala.
Ae 59 tausaga ole isi foi avetaavale na aafia ai foi se taavale i Vaiusuuta ma oo atu iai leoleo, ua molia ile avetaavale faatamala. Na talanoa Auapaau, ole tulaga lea ua iai nei, ua lē misi lava le aso ma faalavelave tau taavale e lipotia mai, ae ua na’o se vaega ole taulaga, ae lē o iloa atu le lautele o Upolu ma le motu tele i Salafai ini faalavelave tau taavale oloo tulai mai ai. Na ta’ua foi le faatāuaina ole iai ole laisene avetaavale, ona ole tele foi o faalavelave oloo tulai mai, oloo aafia ai foi ma avetaavale e leai ni laisene .
“O su’ega o laisene e faia i Aso Gafua, Aso Lua ma Aso Faraile mo le silafia/theory. A faapea e pasi le theory, ole aso e sosoo ai ole practical, a pasi le practical, ona totogi lea ole $173 ole laisene, mo le Private, ae a manao ole laisene toe faafou, e $142 tala.
Mo le laisene Taxi, $111 tala i le laisene fou, ae a toe fafou, $26tala ile vasega. Ole lipotia ai pea o taavale lavevea i aso uma, aso uma ile ofisa o leoleo pei ona talanoa mai ai Auapaau e mafua lava ona ole saosaoa, ‘onanā, faatamala pei ole faaaoga ole telefoni a’o ave le taavale, faatasi ai lava ma uiga mansani foi lea ole mimita vale.