Na faaiuina galuega faaletausaga a le Ekalesia AOG Church of Samoa i le aai o Melepone i la latou aso taalo na faataunuuina i le aso luasefuluono o Tesema le aso o le Boxing Day.
Na aofaga potopoto falesa uma e ono ma a latou aulotu e faamae‘a faatasi le tausaga ma fiafia faatasi ai, o taaloga sa faatinoina ai le sagisagi fiafia o alo ma fanau ma faatino ai le agaga o le nofo fealofani aemaise o le tasi o le loto. O le lakapi pa‘i (touch rugby) mo alii ma tamā, ae o le volipolo mo tamaitai ma tina, faatasi ma le tele o isi taaloga e masani ai Ekalesia i mafutaga faapenei. Mataina le tosogamaea, o tuuga taga aemaise o tuuga fuamoa.
O le agaga autu e pei ona faamamafaina i le saunoaga a le taitai o Vitoria le susuga ia Pastor Apouani Unasa.
E lē o se tauvaga ae o le mafutaga ina ia faatumauina le anavatau ma le mau tauave a le ekalesia, o le Fealofani. O aso foi faapenei e tele ina maitauina ai le feoeoeai ma miomio faatasi o tagata matutua ma tupulaga talavou faapea nai tamaiti.
O se faataitaiga tāua ma le aogā lea mo alo ma fanau, o le taaalo faatasi ma sui matutua o a latou aulotu, aemaise lava o a latou faifeau. Na maitauina le sapai ma faatāuaina e tupulaga le agaga o le aso, e talitonu o faanaunautaiga ia o soo se faafeagaiga, le talisapaia e vaega eseese uma o ekalesia ma falelotu taitasi o le anavatau (vision) a le Ekalesia aoao.
Na faamanuia le Kirisimasi ma talotalo mo le aulia faatasi e le Ekalesia atoa i Melepone se Tausaga Fou fauuina ma le manuia. O Faamanuiaga a la tatou tautua lenei a le Iniini, sagai ane ai o le tai, tumau le faauuga mana a Keriso i falesa uma o le Ekalesia ma ia manūteleina fuafuaga fai o le 2015.
