O le Aso Tofi o le vaiaso na mavae atu nei sa fai ai ma aso taalo o le Aoga a St Peter Chanel Preschool i Otara.
O lea fuafuaga na afua mai ona o le polokalame e ala i le maitau a faiaoga i le fiafia ma le faaalia pea o le naunautaiga o tamaiti i galuega faatino i taaloga.
E tusa ma le lua vaiaso o maitau pea e faiaoga le naunau lava o tamaiti e ala ia latou talanoaga ma faasoaga e lē gata i taaloga latou te matamata i ai i le televise, ae faapena foi ona latou faasoa ma le faamatalaina o taaloga e auai atu i ai a o latou uso, tuagane poo tuafāfine foi i le faaiuga o vaiaso taitasi.
O le maitauina la lea ma le faasoa a tamaiti na a‘e ai loa se tofa i le aiga faiaoga ua tatau ona faalautele le vaai ma le faatino a tamaiti o le aoga i le saunia lelei o se aso taalo mo i latou e faatinoina ai a latou taaloga pei ona talanoa soo i ai.
Na logoina mātua o le aoga ma faapena loa ona sauni le fanau mo le aso ua atofaina auā sa tau sema foi se aso lelei ona o le tau loulouā i timuga ma le savili, peitai na matuā to‘a lelei ma lagimalie le Aso Tofi tonu lea na faataunuuina ai le faamoemoe lenei.
O se aso sa tele ni a‘oa‘oga na mafai ona maua e le fanau e tusa ma alafua, sini ma fua faatatau na fai ma taiala o le polokalame.
O le lagolago mai foi a mātua sa lei faatafa lava ona o le faanaunautaiga ma le faamoemoe lava e tasi ina ia maua ai ni a‘oa‘oga aogā aemaise ia ausia sini, alafua ma fua faatatau e pei ona sa fuafuaina e faiaoga mo le fanau e ala lava i lea polokalame matagofie.
E tele ni taaloga eseese sa tapenaina e faiaoga ma na maitauina ai lava le fiafia o tamaiti e faataitai ma faatino taaloga uma. Sa vaaia foi le galulue faatasi o tamaiti e faataunuuina ai taaloga aemaise lava o le faagaioina o o latou tino sili foi le faalauteleina o le mafaufau i le faatinoga o taaloga.
Na mae‘a le polokalame o taaloga ona fai lea o le laugatogi ma faatofutofusia ai tamaiti uma ia latou pine auro, pine siliva ma pine apamemea.
O le isi faamoemoe o le polokalame lenei o le faatāuaina lea o le sootaga a mātua ma le aoga poo faiaoga foi auā lava le faafaigofieina o fesootaiga mo le faamoemoe i le manuia ma le a‘oa‘oina o fanau a o iai i aoga amata.
E faafetai ai pea le lagolago malosi mai a mātua uma ae sili foi le faamalo i le vasega o faiaoga ona o la latou matafaioi mo le a‘oa‘oina o fanau auā so latou manuia o le lumanai.
