E sefulu ma le ono au faafiafia mai le stake a le Ekalesia o le Au paia o aso e gata ai a Deerpark, na vaevae ma tofia e faatinoina tu ma faafiafiaga ae na matele lava i atumotu o le Vasa Pasefika e aofia ai ma Samoa, Toga, ma Maori.
Na matuā faatumulia ai le malu a le Ekalesia i le Aso Toonai na tea nei, i le mamalu ma le paia lasilasi o le Ekalesia, aemaise o le valaaulia, ma le malosi o le tupulaga talavou, ona o le aso faatauaina a le stake mo tu ma aganuu eseese, aemaise o le faaalia o laei ma teuga mo faafiafiaga mai lea atunuu ma lea atunuu.
Na uigaese foi le mataina o le tulai mai o alo ma fanau a le Ekalesia ia latou faatinoga e lē gata i faafiafiaga, ae o le faatinoina o nisi o vaega o tu ma agaifanua, e pei o le paluina o le ava ma ona laasaga uma. Sa aofia potopoto uma le susū o susuga i Epikopo o le stake, faapea foi le peresitene o le stake atoa, le susuga ia Kalolo Manua. Na amataina le faamoemoe o le Ekalesia i le lima i le afiafi, ma faaiuina i le itula e iva.
Na molimauina le lalelei o le tupulaga talavou ma aufaafiafia eseese ia latou togiga ma laei. E tāua tele aso ma faamoemoe faapenei, ona e fai ma faamanatu i alo ma fanau o soifua ma ola i atunuu i fafo, a tatou tu ma le agaifanua faa-Samoa moni, ina ia o latou ona tauave ma ola ai, i le va faafeagai ai ma tagata. “E iloa le Samoa moni i lana tu, lana savali, lana tautala, ma lana faaaloalo”.
