E tāua tele le soifua maloloina ma le soifua saogalemu o tagata uma ni totonu o falefaigaluega.
O le ‘au‘au lea ma le manatu sa faaautū i ai se polokalame tau a‘oa‘oga na faatautaia faapitoa mo se aso e tasi e nisi o kamupani ma faalapotopotoga i totonu o Aukilani i le masina na tea nei.
O le Aso Faraile, aso 20 o Aukuso 2010, lea sa faaigoaina o le Aso o le Puataunofo. O le nofoaga i Otahuhu o le kamupani gaosi moega, le Sleepyhead, lea sa faia ai le a‘oa‘oga ma e tusa ma le 130 tagata faigaluega ma supavaisa na auai. Na taofi galuega a le Sleepyhead mo lena aso atoa, ina ia mafai e ona tagata faigaluega uma ona auai i le a‘oa‘oga.
O le tele o tautalaga sa faatāua ai auala eseese e tatau ona mataala i ai tagata uma ina ia saogalemu i taimi uma e faatino ai galuega.
Na filifilia le Puataunofo e faaigoa ai lenei polokalame ona o le 90% o tagata o loo faigaluega i le Sleepyhead, o tagata mai le Pasefika.
Sa auai sui mai le Matagaluega o Leipa mo le fofogaina o nisi vaega o le a‘oa‘oga, na faaali foi se DVD a le Puataunofo e faaulutala i le faaupuga faa-Peretania, “Come Home Safely” pe ‘Ia Foi mai ma le Saogalemu i le Aiga’.
E manatua ai upu e pesepese ai lava nai mātua i taeao taitasi a o tatou lei taape atu i galuega, o a‘oga poo nisi lava mea tatou te ono faatinoina; e faamanuia ma faatofā mai mātua ona toe faapea mai lea, “Pupula faalelei ou mata i e lavea”.
Atonu o le faamanatu tāua lena sa faamamafa i lea aso o a‘oa‘oga a le Puataunofo, ia galulue malosi, ia galulue maelega, ae sili atu ona tāua, ia galulue ma mafaufau i le tāua o le tausia o se ola e maloloina ma saogalemu.
O le susuga Pale Sauni, sa momoliina mai i se auala na mafai ai foi ona sufi mai manatu o le ‘au aooga, le mataupu e faatatau i le saogalemu i le itu tau seleni ma le aogā o le iloa faitau ma tusitusi, ina ia malamalama tagata uma i soo se faatonuga e maua mo le tausisia o le saogalemu.
Na faaiuina manuia le faamoemoe ma taape ai le fuamanusina ua tofu le tagata ma si ana faalumaga o mea lelei na a‘oa‘oina i lea aso. Na tufa foi a latou ato o le Puataunofo, sa fafao atu ai nisi pepa o faamatalaga auā le faalauteleina lava o lea mataupu, ae na afifi atu ai foi ma nai faamanuiaga laiti na saunia e le kamupani malosi o loo gaosia nisi o taumafa, le Sanitarium Health Food Company.
Na matuā faafetaia e tagata faigaluega lenei a‘oa‘oga, i le iloa o loo amanaia ma faatāua lo latou saogalemu e pulega o o latou falefaigaluega. Na ta‘ua e se tasi o i latou nei, ua 34 tausaga o galue i lea kamupani, ae o se taimi muamua lea ua faato‘ā faia aloaia ai se a‘oa‘oga faapea mo tagata faigaluega.
O loo faamanatuina e le kamupani a le Sleepyhead New Zealand le 75 o tausaga tau ona amata lana auaunaga o le gaosia o moega.
O le a‘oa‘oga i lea aso o se polokalame na tuufaatasia e le Sleepyhead ma le Puataunofo Steering Group, faatasi ai ma le lagolago mai a le kamupani gaosi meaai, le Sanitarium Health Food Company, o se tasi o paaga e lagolago tele i polokalame o le Puataunofo.
O le Puataunofo Steering Group o loo faia a‘e i sui mai le Matagaluega o Leipa, Matagaluega o Mataupu tau Atumotu o le Pasefika, le Iuni a tagata faigaluega i galuega tau Inisinia, Lolomi & Falegaosimea (Engineering, Printing & Manufacturing Union), o sui o le Pulega a le Aai o Manukau, le vaega a le Injury Prevention Network of Aotearoa NZ, Pasifika Injury Prevention Aukilana Inc., Lavea‘i Trust Inc., ma le Pulega a le Trade Unions Pasefika.
Ua ta‘ua i ni faamaumauga, e toatele tagata Pasefika o loo manunu‘a i tausaga taitasi ia latou galuega, ae o le tele o nei manu‘aga sa mafai lava ona alofia ma lē tutupu.
O Finauga ma Isaac, e aofia ai i na numera, ma o loo faamatala ia la tala le faigofie tele ona tulai mai se faalavelave i nofoaga o galuega, ma ta‘ua ai foi le tiute tāua e ao ia i tatou uma ona faatino mo le puipuia o le soifua maloloina ma le soifua saogalemu.
E faatalitalia tagata uma e tatau ona toe foi ma le saogalemu i o latou aiga i aso uma pe a mānava. O le visiona poo le moemitiga lena a le vaega o le Puataunofo, ia uunaia le mataalia ma le nofouta o tagata faigaluega uma o le Pasefika, ina ia agai mai i le galuega i taeao taitasi ma toe taliu saogalemu i aiga i le iuga o le aso.
