Aso faitaulia ale Divine Mercy… Sulufaga a Iesu le Agaalofa Mamana

Nisi o tupulaga talavou sa feagai ma le faaevagelia i sauniga paia ole Misasā ole Sulufaga a Iesu le Agaalofa Mamana
Nisi o tupulaga talavou sa feagai ma le faaevagelia i sauniga paia ole Misasā ole Sulufaga a Iesu le Agaalofa Mamana

Ole goto ifo i aai o loto ma finagalo ole mālie oni pesega, ose lauga pito sili lea ona faaulu gofie i agaga o tagata aemaise lava ise loto o mafatia. Ile autalavou e pei ona molimauina ai le aso faapitoa ole Sulufaga a Iesu le Agaalofa Mamana ile Aso Sa ua tuanai.

O pesega uma lava na fai sao ai Senakolo ma tupulaga talavou, na fai lea ma teuteuala, e faamaualuga ai le viiga ole Atua a’o feagai ma le sauniga ole Misasā Pa’ia, e pei ona tuli tatao mai ai ele toatele lenei aso taua i tausaga uma.

Ole tausaga ua tuanai na taitai le Divine Mercy a Darra ae ole tausaga lenei ua oo mai le faasologa ile Divine Mercy a Inala, sa lei faatumutumulima foi la pe alo tamala Inala ia latou sauniuniga uma.

E oo foi ile faaanofoaliiina ole upu ma le moliga ole taulaga, sa fai sao ai nisi senakolo, na mata’ina foi ile silasila a tagata e fou atu auā ua masani ai lava tagata lotu ole Ekalesia Katoliko ile faatinogina o ana sauniga mamalu e viia ai le Atua, e ala i tu ma aganuu a Samoa.

O lenei aso faamanatu o Iesu le Agaalofa Mamana, ua poo le SULUFAGA, e masani ona faamanatu ile Aso Sa e lumanai ai pe a mae’a le Eseta po ole Aso Maliu ole Faaola e pei ona faamanatuina ele lalolagi.

E ono (6) Senakolo ole Divine Mercy a Kuiniselani lea e aofia ai Inala, Goodna, Woodridge, Jindalee, Darra ma Caboolture lea sa faatasia uma ile latou faamoemoe o lenei tausaga.

Na faatumulia le malumalu ole Palisi a St Marks a’o taitaia le Misasā Paia ele afioga ia Patele Epati Tamati Aiolupotea, faatino foi isi vaega tāua ole sauniga ona faaiu lea ile taumafataga tele sa felagolagoma’i ma pulupululima iai Senakolo uma.

Ose tasi lenei o aso faitaulia i totonu ole ekalesia, na aumai ele Tamaitai Sa o Faustina e fai pea ma taitaiala, e tapenapena iai tagata uma ma le lalolagi atoa mo le toe afio mai ole Faaola, lea e afua ai ona tuli se ‘ai faaleagaga ole tagata lava ia.

Ole Taupou ma manaia sa momolia le taulaga ile Misasā ole Sulufaga a Iesu le Agaalofa Mamana
Ole Taupou ma manaia sa momolia le taulaga ile Misasā ole Sulufaga a Iesu le Agaalofa Mamana

Ole Sr Faustina, ole avefeau a Iesu le Agaalofa Mamana ina ia ta’u mai ile lalolagi le toe afio faalua mai ole Faaola.

Na soifua mai ile tausaga e 1905, ae maliu ile 33 o ona tausaga ae oloo olaola pea ana galuega lelei, lea oloo faatinoina pea ma faamanatu e Senakolo uma.

E tolu lava aso faapitoa o Senakolo ile tausaga, lea foi e faamanatu pea i Kuiniselani.

Ole uluai faatasiga lenei ole Sulufaga a Iesu le Agaalofa Mamana sa tamua ai lenei tausaga, na faataunuuina ile Aso Sa ua tuanai, ae ole isi aso faapitoa, e faia ile masina o Oketopa ae faaiu ile faatasiga a alo ma fanau ma le autalavou ia latou faaevagelia ile faaiuga ole tausaga. Oni faagaioiga e faaali ai taleni a le tupulaga talavou e ala i o latou siufofoga malie aemaise le naunau ole ekalesia e auai i nei Misasā e potopoto ai Samoa.

Ole masina o Fepuari ole tausaga nei sa usuia ai le uluai fonotaga tuufaatasi a le Faleono, lea na talanoaina ai ma fetufaa’i finagalo i ni vaega e ono faaleleia atili, ma ni vaega foi e ao ona toe teuteu auā se lelei mo le agai i luma, aemaise le faamautuina ole Sulufaga lenei a le Divine Mercy o lenei tausaga.

Na talanoaina ai foi le faamoemoe ile aso 5 o Oketopa ae ole Aso Sa e sosoo ai le aso 7, e faamanatu ai le atoaga ole 80 tausaga talu na maliu le Tamaitai Sa ia Sr Faustina, ae ua atoa ai foi le 113 tausaga pe ana fai e oo mai ile taimi nei o soifua mai pea.

Ole ta’ita’i o Inala, susuga ia Tolu Pisa Iulio sa fai ma fofoga ole aso ae ole fetalaiga ia Ale Halo Milford o ia le teuoloa na tasi moemoe iai le Divine Mercy a Inala e faaleoina se agaga faafetai ma tauaao se meaalofa mo le afioga ia Patele Epati Tamati Aiolupotea mo lona sao taua i lo latou aso faapitoa.

Na ta’ua e le susuga ia Tolu Pisa Iulio, o latou lea ua faatautaia le taitaiga ole Sulufaga ole tausaga nei, na ia saunoa e faapea, oloo solosolo lelei pea a latou fono tatalo (prayer meetings) i afiafi o Aso Gafua taitasi, faapea Aso Faraile muamua o masina mo le tasi le itula e faatasi atu ai ile nofoaga ole ekelaesia ile Valley e tatalo leoleoa ai lava le tagata e molimoli atu talosaga faapitoa e talosia ai aiga, nuu aemaise le ekalesia ma le lalolagi atoa ile va ole 11pm-12am.

O Aso Lua taitasi i faaiuga o masina uma pe a mae’a le Misasā ile Palisi ua mae’a fuafuaina lea aso e agai atu ai asiasiga a Inala ile maota gasegase tele a le P.A (Princess Alexandra Hospital) faapea le falema’i a Mater.

E naunau lava le Divine Mercy e fia asia le falepuipui peitai e iai lava aiaiga faapitoa e moomia se taimi umi e tapena ai.

Afioga ia Patele Epati Tamati faapea Sr Antonina mai Melepone ma nisi ina ua mae’a le Misasā ole Sulufaga a Iesu le Agaalofa Mamana
Afioga ia Patele Epati Tamati faapea Sr Antonina mai Melepone ma nisi ina ua mae’a le Misasā ole Sulufaga a Iesu le Agaalofa Mamana