O se tasi lenei o Sosaiete pito sili ona tāua i faalagamaea i totonu o le Ekalesia aoao a le Aso Fitu Samoa Tutoatasi, e lē gata i le lalolagi atoa ae faapea foi i totonu o matagaluega ma aulotu.
O le tusi o Galuega 9:36, sa i Iopa le tasi soo fafine o Tapita le igoa, e ta‘ua pe a faamatalaina o Toreka, ua tele ana galuega lelei ma mea alofa na ia faia. O le uiga la lea o le igoa ua lauiloa ai lea sosaiete fesoasoani, o TOREKA.
E faatāuaina tele lea vaega, auā soo se mafatiaga lava e muai tupu mai, o i latou nei e taulamua ma muamua ona auina atu fesoasoani, e pei o asiasiga i gasegase, totonu o le toese aemaise nai tamā ma tina matutua faapea fanau ma ē lē atoatoa le malosi o le tino ma le mafaufau.
E oo foi i le mafatiaga sa mafatia ai Samoa i mala faalenatura ia Setema 2009, o le sosaiete fesoasoani sa suitulaga i le Ekalesia aoao i le lalolagi, sa tuuina atu soo se ituaiga fesoasoani. E lē faatapulaaina i latou i totonu o lea matagaluega, e lagona foi e tamā latou le fia soosoo tau‘au e lagolago lea vaega o taulamua ai faletua o le aufaigaluega faapea le vasega o tina.
E tapena ma lava saunia lelei polokalame uma auā e faatasi i le tausaga ma faamanatu lea aso faapitoa. Na faatumulia auā sa tauaofai ekalesia e fitu a le matagaluega SISDAC, sei vaganā ai le ekalesia e i Cairns sa lē mafai ona paau mai e valu i ai ekalesia a le Matagaluega.
E tele nauā ē sa malaga asiasi mai e aofia ai le Taitai o le matagaluega a Samoa le Susuga ia Pr Iafeta Masepa‘u, o ia lea sa ia taitaia le lesona i le aso faapitoa i le sapati, faapea nisi faafeagaiga malaga mai Niu Sila ma isi Setete o Ausetalia.
Sa matagofie se taumafa faaleagaga sa mafai ona logo faatutuila ai le faafofogaaga, sa saunia lava e le faafeagaiga ia Pr Togamau Tuia. O le tele o viiga sa lagiina lava e le Sosaiete fesoasoani poo le Toreka.
O le faamanuiaga i tulagatofi aoao a le Sosaiete Fesoasoani i le lalolagi o loo suipi ai Kuiniselani e pei o le Faifeau a le Sosaiete Aoao, o le Susuga ia Pr Togamau Tuia, o ia o loo tausia le ekalesia a Inala ma Kingswood. O le taitai o le sosaiete aoao o le faletua ia Puataunofo Levae, faletua lea o le taitai matagaluega a Kuiniselani, Susuga ia Pr Lagolago Levae.
Mo le silafia e isi ekalesia i le lalolagi a le SISDAC, o loo mamalu ma maopoopo lea foi vaega o le galuega ona o le lagolagosua a faletua manumalo e pei o Matagi Kitiona Sione, Sina Pone faapea susuga i Faafeagaiga ma toeaiina ma le tele o tina matutua o faufautua auā le manuia ma le agai i luma.
O le auofisa a le Matagaluega a Kuiniselani: Taitai – Mutaaga Lauago; Fesoasoani Taitai – Siulepa Fetoa‘i (faletua o le taitai toeaina a QLD Tamala Folau); Failautusi – Ane Simanu (faletua o le faafeagaiga ia Alesana Simanu); Faatamā – Tauloa Faauma Mene.
