O se afiafi toafilemu i le mae‘a ai o tausamiga o le aoauli o le Aso Sa aso 2 o Mati, na toe tuufaatasia ai autalavou uma o Pulega e tolu a le Matagaluega EFKS a Kuiniselani, ona o le aso faapitoa e pei ona masani ai i tausaga uma e patino ma faatāuaina ai tupulaga talavou. O le auga ma le naunautaiga o faamoemoega o faafeagaiga ma mātua o le matagaluega EFKS, ina ia faamalosia pea le tapueina o agaga o tupulaga talavou e pei ona amataina i le ta o le 4 i le afiafi i le Aso Sa.
Na uigaese tapenaga sa faisao ai nei pulega e tolu e ala i viiga tai lua o le sauniga mai pulega ma latou aitema taitasi faaleagaga. Sa lei alo tamala foi le tupulaga talavou i faatinoina ma le momoliina mai o se feau tāua auā le faafofoga tapuai a mātua ma le matagaluega e ala i lo latou aso faapitoa o lenei tausaga. O le susuga ia Faasoi Maua o le taitai lea o le autalavou a le matagaluega sa auai foi lona failautusi. E lē gata i lea sa lagolagoina e susuga i toeaiina, faafeagaiga ma faletua ma le loaloa o le matagaluega e ala i le mafuta atu, ma na logo faatutuila i le faafofoga vaega uma o lea afiafi.
