E tolu pulega o le matagaluega EFKS a Kuiniselani, o le susuga i le toeaina ia Kerita Reupena o le faatonu lea o le ekalesia ma o loo ia tausia le Pulega EFKS a Purisipeni Sisifo faatasi ma si ona faletua ia Binary.
O le pulega a Purisipeni i Saute o le toeaina ia Tauaaga ma le faletua ia Senerita Mata‘afa, ma le pulega a Purisipeni i Matū o le toeaina ia Lauie Lupematasila ma le faletua ia Autalaga.
O le masina o Fepuari o se masina pito sili lea ona pisi i tapenaga a le Matagaluega EFKS i le taimi nei.
E lei mamao atu le 3 aso sa faagasolo ai le tofiga tele e pei ona faataunuuina i le Aso Tofi, Aso Faraile ma le Aso Toonai, o le toe filifilia lea o tofiga a e Matagaluega, o nisi lava o loo tumau latou tofi se‘i vaganā ai ua suia i le taimi nei.
O loo vaaia le tulaga siitia o le galuega i soo se vaega e ala lea i le faatupulaia pea o le fuainumera, ma e 22 ekalesia o le matagaluega EFKS a Kuiniselani ae tolu lava pulega. O le Aso Sa la o le vaiaso ua tuanai atu nei ua leva ona loma ma makaina i kalena a le ekalesia e faatāuaina mo tupulaga talavou uma a le EFKS. E faamanatu ai pea galuega lelei ma tiute fai e pei ona iai le tele o talavou o faamanuiaina i nisi o tofi ma o latou taumafai o loo siitia ai le ekalesia.
Sa faatinoina uma e alo ma fanau polokalame uma o lea sauniga poo le aso faapitoa. Sa lē mafai ona tuufaatasia le matagaluega ona o le vavamamao o nofoaga, peitai sa fai lava le sauniga faamanatu ia a le Pulega ma na faato‘ā amata i le afiafi i le mae‘a ai o sauniga masani o le Aso Sa.
O nisi nei o faagaioiga o loo mafai ona taofiofia mai ai le tele o tupulaga a le ekalesia mai fiafiaga o le lalolagi, ma o se mitamitaga sili lea i le tele o mātua ma le aufaigaluega faafeagaiga.
Sa vaaia le naunautai o tupulaga talavou e ala i le tulimatai e faatinoina o latou tiute mo lo latou aso faapitoa.
Na sagisagi fiafia e fai le mea sili auā ua taunuu ai le tasi muāgagana, e faatasi na sau le avanoa, e lē mailoa foi i lea tausaga fou pe toe maua se isi avanoa faaauro faapenei a o le taimi nei ia fai i le mafai e gata mai ai, o nisi nei o manatu faaalia sa faaalia e le tele o tupulaga a le EFKS.
