Aso e fiafia ai le Aiga atoa i Otara

E faamalie gofie lava nai fanau pe afai e iai se mea e faatumu ai o latou avanoa, ma fiafia ai foi a o faagasolo a latou tuuaga mai le aoga i lenei taimi.
O le ala foi lea o le faaaogā lelei o lenei avanoa e le sosaiete poo le asosi a le aufaipisinisi i le taulaga faatau i Otara, e faatulaga ai se latou aso mo le tele o polokalame eseese, e maua ai e le fanau le ‘ata ma le fiafia, ae i le taimi e tasi, o le a iai foi ni aoaoga ma ni tomai e latou te aoaoina mai ai i tautua eseese o le a faalauiloa.
O le Aso Toonai nei, aso 27 o Iulai, e amata mai lava i le 9:00 i le taeao seia oo i le 12 i le aoauli, ua faatulaga ai le tele o ni faafiafiaga ma faaaliga o tomai eseese o le a faia i le ogatotonu o le taulaga faatau i Otara, le nofoaga ua masani ona faagasolo ai polokalame faapea. E ui ina faatulaga le tele o polokalame ina ia maua le ‘ata ma le fiafia, ae o le auga autū lava aemaise o lea ua tuua aoga a le fanau, ina ia faagasolo ai foi le faalauiloaina o polokalame o le siitia atili o le soifua maloloina, o le tulaga o tomai o loo faagasolo ai aoga i  nisi o polokalame tau aoaoga, aemaise foi le faalauiloa o tautua a nisi o faalapotopotoga o loo nafa ma le tausia o le soifua lelei o le mamalu o le atunuu. Aua ne‘i misia lenei aso e ave ai lau fanau e faamatamata ma faatafafao i lea polokalama, auā e fai ai foi le Zumba mo le faamalositino, faataitai ai le faiga o kuka, ma faalauiloa ai foi nisi o sikaili eseese o laei ma teuga eseese.
Tele mea o le a faapitoa mo le faatafafaoina o tamaiti, maua ai foi le sosisi e taumafa mo le lunch, ma le tele o ni faailoga e tufatufa ai foi mo le fanau pe a auai i nisi o tauvaga.  E tele isi mea o le a faafiafia ai le aiga, ae faatoa talitonu lava ma faamalieina, pe a agai uma atu i lea nofoaga i le Aso Toonai nei, aso 27 o Iulail, 2013.
Ave uma lau fanau, e faatafafao ma faafiafia ai foi i nei aso o a latou tuuaga o aoga.