O kuata lona 3 uma lava o tausaga taitasi, e feagai ai aoga uma a Aukilani i Saute ma Tauvaga Tautalaga faa-Samoa.
O ia tauvaga tautalaga, e faamalosia ai alo ma fanau a Samoa ina ia faatāua le gagana Samoa ma faatumau pea lo latou mitamitaga e tāutala ai, e lē gata i taimi o vasega a o le lauga foi mo tauvaga a aoga i Aukilani.
O le faamoemoe e pei ona sa feagai ai le Sutton Park i le Aso Faraile, 7 Setema 2012, o le faaiuga lea o le 4 vaiaso sa feagai ai le aoga ma le faamanatuina o gagana eseese, o mataupu tau aganuu, aemaise o taumafa a atunuu eseese.
Ona iai lea o se fuafuaga a le tamaitai pule ma faiaoga, e valaaulia mātua ma le community.
Sa polokalameina le faamoemoe, ma avea ai o se suega tupe e fesoasoani ai i le faatauina o mea e faaaogā i taaloga a le fanau (more sports gear), o le camp a le vasega matutua, atoa ai ma tusiaoga a le fanau. Ma e maeu le lagolago malosi o le mamalu o mātua Samoa i lea aso, e ala lea i le faatauina o taumafa aemaise o le aaofoai mo faafiafiaga a le fanau.
E 2 vasega a le Samoan Bilingual o loo iai nei i le Sutton Park. O tamaiti i le 5 – 6 tausaga poo le Y1 & Y2 e to‘a 18 lea vasega. O le vasega a Mrs Diana Tuaopepe, Y3 – Y6 e 23 le fanau o loo iai.
O loo iai pea le faamoemoe mo se isi vasega, peitai e tuu lava i le faitalia o mātua e aumai ai o latou alo ma fanau i le vasega Bilingual. Na iai le faamoemoe e toe mafuta mai le Tausala Samoa, le Miss Samoa NZ i le Culture Day, peitai sa lē talafeagai le taimi ma ana polokalame.
Saunoa le tamaitai faiaoga, susuga Gata Tosogi, o ia foi o loo faaulu i ai le iunite Bilingual a le Sutton Park, o le faanaunauga lava ia lata mai se aso e finagalo malilie ai le mamalu o mātua Samoa e tuuina mai alo ma fanau i le Bilingual.
Auā e iai lona talitonuga, o le toatele o mātua o loo manatu, e vasega loa le tamaitiiti i le Samoan Bilingual, ona lē toe iai lea o se taimi e nanu ai le tamaitiiti.
Ae o le faamanatu a le tamaitai faiaoga, e tāua pea mo alo ma fanau, le taofimau i lana lava gagana. O le tala moni lava, o le toatele o alo ma fanau o loo amata i le Samoan Bilingual, e matuā lē mafai lava ona tautala i le tatou gagana. Ae o le faia o lotu i le taeao ma pepese i pese Samoa, e faamalosia ai le gagana a alo ma fanau. Peitai e pei ona saunoa Tosogi, o le finagalo malie lava o mātua e fai ai le latou filifiliga.
Sa momoli foi le faafetai a Tosogi, e fai ai o ia ma sui o susuga i faiaoga Samoa i Sutton Park, e faamalo ai i le mamalu o mātua uma sa faatasi atu i lena aso mo le lagolagoina o le faamoemoe o nai fanau.
O nisi o faiaoga Samoa o loo galulue ai lenei aoga i Magele, e pei o Ms Gata Tosogi, Mrs Diana Tuaopepe, Mrs Sophie Lemalu, Ms Sapi Neemia, Mrs Margaret Hunt ma Mrs Otaota Tautaiolefua.
