Asiasiga Ofisa Tulitulimatagau & Aoaoga Kerisiano i le Faleono i Kalaiesetete

O se uluai taimi lenei ua asiasi mai ai i le motu i Saute le faigamalaga mai Samoa a le ofisa tutotonu o le Tulitulimatagau faapea le ofisa o Aoaoga Kerisiano i autalavou ma aoga Aso Sa a le Ekalesia Metotisi, lea sa malotia ai le faleono o matagaluega amata mai Invercargill, Dunedin, Ashburton, Halswell, Addington ma ofaga potopoto i le matagaluega Kalaiesetete i le amataga o le masina o Fepuari.

E toafā alii faifeau na malaga mai pei ona to‘ai taunuu ai le sinoti i Niu Sila i Matu, ma faasolo mai ai le latou polokalame i le sinoti Niu Sila i Saute, ua muai afea ai matagaluega o le faleono i Kalaiesetete ma ua taunuu faatasi mai lava ma susuga i tausi matagaluega o aulotu ua ta‘ua pei ona toesea ai i le mafutaga a Piula Tuai i le masina o Ianuari.

O i latou na malaga mai Rev Poulea Tonise (Faatonu: Tulitulimatagau, Tafuna) ma lona sui Rev Talafou Seiuli (Tiavea) faapea Rev Koneferenisi Tuaiaufai (Faatonu: Aoaoga Kerisiano, Neiafu) ma lona sui Rev Taeano Latu Amani (Sala‘i, Vailoa Aleipata & Alafua).

O le auga o aute pei ona faatatauina o le polokalame faagasolo i sinoti taitasi ua faapitoa lea i taitai ma ofisa o autalavou, faiaoga Aso Sa, o taitai o le matagaluega ma failauga o le Talalelei e pei ona faafoeina e le Tulitulimatagau.

Na taunuu le malaga i le po o le Aso Tofi, ae o le afiafi o le Aso Faraile ina ua mae‘a le taumafataga, sa taape loa i workshops e lua, o le autalavou & aoga Aso Sa, faapea taitai ma failauga ma o le aumalaga lava sa faafoeina le faamoemoe.

Matagofie le saunia lelei o pepa o le faatalanoaga, o le autū o workshops e pei ona faaalia e Rev Poulea Tonise o le toe tapueina lea o agaga ma se toe fagufagu ina ia toe faamumu le lamepa o faiva faafailauga o le Talalelei faapea faatinoga o le aoaoina o fanau aoga Aso Sa ma le tupulaga talavou.

O le taeao o le Aso Toonai ina ua mae‘a le malu o le taeao faatasi ma le faleono i susuga tausi matagaluega ma o latou faletua, faifeau malolo ma le mamalu lautele, ona taumavae lea ma le faigamalaga, o le fetalaiga Auimatagi Mataafa (Dunedin) sa fetalai e molimoli se faafetai a le faleono e tusa ma le tuutuu laau mamao mai o ofisa tutotonu o le ekalesia, aemaise le tufa faaleagaga e ala i faiva alofilima ua tofia ai e le Koneferenisi.

Na faapea foi ona saunia e le faleono nai faaaloaloga mo le faigamalaga, o le susuga faifeau malolo Elisara Elisara na tatalo faaiu, tatala le filialii ma faamavae loa, faaauau atu le asiasiga i le matagaluega i Ueligitone ma tuuvaa atu mo Ausetalia.