O le vaiaso ua tuanai atu (29 Iulai – 1 Aukuso) sa asia ai nisi o aoga i Aukilani e le faigamalaga mai Samoa, o i latou oloo taiulu i mataupu eseese o le Taiala mo aoga tulagalua.
Sa taitaia mai lenei faigamalaga e le tamaitai o Rosemary Esera, ma le faletua ia Faaea Mulitalo Roache, ua leva ona tautua isi o tatou atunuu e ala i le ofisa o aoga, faapea le tofa Fata La Leaana mai le itumalo malosi o Safata.
O le autu o le faigamalaga o le fia aoao lea o ni auala ma ni manatu, e faavae ai le Taiala fou mo aoga tulagalua oloo ua amata ona sauniuni e faatinoina, ina ia o gatasi ma le tulaga ua agai iai le tele o atunuu o le lalolagi, e faatatau i le tulaga ua iai suiga o le tau, suiga o faataamilosaga o fesootaiga, aemaise le tulaga o galuega.
O le tele o aoga sa mafuli iai le asiasiga, o aoga ia oloo faaaogaina gagana e lua (Samoa/Igilisi), e aoao ai mataupu i totonu o potu aoga (Bilingual Education).
O se tasi o aoga sa oo atu iai le asiasiga, o le aoga lea a Mangere East, oloo taitaia le polokalame e le faletua ia Malo Sepuloni, ma lana auvaa, o le faletua ia Rasalama Peato, Mataia Anita Lealaiauloto Falefitu, ma Poia Saipaia.
Sa matua maofa le faigamalaga e le gata i le lelei o le faasamoa a tamaiti i nei polokalame, ao le tulaga o le tomai i le numera, faitautusi ma le tusitusi i gagana e lua.
O le autu lava lea o nei polokalame, ina ia le gata i le lelei o le mafaufau e fetuutuunai ai manatu i le gagana Samoa, ae ia faaaoga ia tomai e atinae ai le gagana lona lua – Igilisi.
O se tasi o aoga sa fuafua e oo atu iai le faigamalaga sei o latou maimoaina le maoae o le lagolago a matua i le aoga mo le aoaoina o fanau, o le aoga lea a Robertson Road i Magele, oloo galulue ai foi susuga i faiaoga ia Semeatu Iosefa, Aliitasi Tugaga, Vaipouli Siliga, Julie Faiva, ma le tamaitai o Martha Aseta.
Sa matua olioli le mamalu o matua ma fanau i se fiafia tele e valaaulia faaaloalo ai le faigamalaga, peitai, ona o nisi foi o fuafuaga, ua le taulau ai le faamoemoe, ae na avanoa i se faatalatalanoaga ma susuga i faiaoga i lea lava aoauli.
O le faalapotopotoga a matua i Robertson Road, ua matua mafanafana le faigapaaga ma le aoga, ua le toe tutu mamao matua ae ua auai i soo se faatinoga po o se fuafuaga a le aoga.
O tulaga fiafia o le faigamalaga, o le faalogologo atu lea i tulaga ua oo iai se finagalo o le taitai ma le matagaluega, o le fia o gatasi lea ma tulaga o aoaoga a isi atunuu, aemaise lava Niu Sila ma Ausetalia.
Afai o tulaga ia e pei ona tolaulauina o le faamoemoe mo se taiala fou, o lona uiga e le tele se eseesega ma le tulaga oloo iai nei aoaoga ma le taiala o aoga i Niu Sila.
O le taimi nei, oloo faagasolo faafouina a faiaoga, i le tele o mataupu sa fia matauina e le faigamalaga. O se tasi o mataupu e pei ona taua e fia malamalama atili iai, o Fuafuaga Fesootai.
O le vaega lea ina ia tasi le autu ae agai uma iai fuafuaga o mataupu ma le aoaoina o le gagana, ina ia alo ese mai le tulaga sa iai o le tuupusa lea ina ia tutoatasi lava le mataupu, ae leai se fesootaiga ma isi mataupu.
Afai la e lima mataupu aoaoina i le aso, o le lima foi lea o mea fou e aoaoina i le aso, o le eseese foi lea o vaega o le gagana e aoaoina.
O se tasi itu taua sa taua e le faigamalaga, o le faataua lea o le fuafuaina e le tamaitiiti o lona aoaoina, e foia ai le faia uma e le faiaoga o fuafuaga ma tonu, ma sasaa mai lona tomai, ae na o le faalogologo o le fanau ma kopi uma ma ao faatauloto.
E tele lava itu sa mataituina e le faigamalaga, sa atagia ai le tele o le agai i luma o le tulaga o aoaoga i si o tatou atunuu.
Sa matua lagona le faagaeetia ma le agaga faafetai, ona o le faalogologo atu i le faasoa a susuga i ulu o mataupu taitasi o le taiala o aoga tulagalua a si o tatou atunuu, oloo ua vavalalata lava ma tulaga oloo faagasolo ai aoga a Niu Sila.
Tau ina ia faatasi pea le Atua i tuite ma faiva, foai le faamaoni, lototele, ma le onosai, ina ia maua e fanau ni taunuuga lelei e tulai mai ai oni taitai lelei ma ni tagatanuu lelei, aua se manuia o si o tatou malo, mo ni lumanai lelei o tagata uma.