Ina ua maua se tala o le a faatasi atu Taitai Faale-Stake e asia le vaega ua o ese mai, na tulimatai i latou e fia feiloai atu ma sa leai se isi na lei mafai ona auai atu ma molimauina le saunoaga mamalu.
O loo finauina pea e nei vaega o le Ekalesia ua o ese mai, ona o le agaga maualuga, o le toe faafoi mai lea o le gagana Samoa i taimi o tapuaiga.
E ese mai Brisbane i nisi o setete o Ausetalia e lē o faaaogāina le gagana Samoa e pei ona aveese mai ai i le tausaga e 2007 e aunoa ma se logoina o tagata.
E talitonu le Aiga Samoa i Logan City ma le Aupa‘ia Sailimalo i Ipswich e lē o se faaiuga mai le faauluuluga o le Ekalesia.
O le fesili o loo tulai mai pea: “Aisea ua tupu ai na o Kuiniselani ae lē o tupu i isi Setete faatasi ma isi atunuu?” O lenei lava mataupu ua oo atu i le faamasinoga e oo mai i le taimi nei e aunoa ma se tali ua oo mai.
O le Aso Sa la aso 5 o Fepuari na tuufaatasia ai ia vaega e 2, ma e ova atu ma le 250 i latou na auai i le tuufaatasiga lea.
Na auai ai le Peresitene o le Stake mai Ipswich ma lona faletua, faapea le alii Epikopo Samoa le susuga ia Bishop Tupu Aiono.
Na faafetaia e le Peresitene le mafai e tagata Samoa ona talanoa atu ia te ia i le mea tonu o loo mananao ai.
E tasi lava le auga, o le toe faafoi lea o le gagana Samoa i tapuaiga i totonu o le Ekalesia; ma o lana saunoaga mulimuli o ia e alofa i tagata Samoa.
Ua manino foi le mata o le vai ina ua faafofoga i le ‘auga o aute ma le pogai tonu loo mananao ai, ae leai se aiā ia te ia e faia ai se faaiuga, pau le itu o le taatia atu o le a taliu atu ma faaoo le fanoga i ē e maualuluga atu ia te ia.
Sa saunoa a ia, atonu e iai se taimi, ae o le agaga moni ua mafai ona maua lenei avanoa e feiloai ai i lenei vaega o le Ekalesia ua liliu mai ma faaauau pea sauniga e faaaogā ai le gagana Samoa.
Na logo mālie le saunoga a le susuga i le Taitai Faale-Stake a Ipswich ma na faamalieina foi i latou na auai i lea sauniga tuufaatasi.
Na taape le fuamanusina ma le manatu maualuga atonu lava e iai se taimi e tali mai ai le Atua e pei ona finauina e nei vaega e lua, le Aiga Samoa i Logan City, o loo taitaia e le susuga i le Peresitene ia Tareta Hakula ma le faletua ia Anne Siakisini, faapea le Aupa‘ia Sailimalo i Ipswich lea o loo taitaia e le susuga ia Neemia Auvaa.