O le faletaalo poo le Gym 2 ma le nofoaga o iai le malae o le taaloga hockey i Tuanaimato i le Faleata Sports Complex, o loo asiasia i le vaiaso nei e se aumalaga o sui sinia o Malo Aufaatasi mo le fia saili o le tulaga o iai tapenaga a Samoa mo ia nofoaga.
O le maota fou o loo fausia tonu i le vaega o iai le malae taalo hockey o le a tapuvae tasi uma i ai galuega a le aufaasalalau a le lalolagi o le a tumutumu mai i Samoa i le masina o Setema 2014 mo le fono tele a malo laiti tau atia‘e a malo Aufaatasi. O le faletaalo Gym 2 le nofoaga mo le fonotaga ma o le mafuaaga foi lea o le fausia tonu o le nofoaga mo tagata faasalalau poo le media center e latalata i ai.
O le aumalaga a Malo Aufaatasi o loo i Samoa i le vaiaso nei o loo taitaia mai e se tasi o ofisa sinia poo le Undersecretary General a Malo Aufaatasi o Wu Hongbo ma le to‘a sefulutasi o sui o lana aumalaga.
O lea alii e maualuga lona tofiga i Malo Aufaatasi ma o loo lotolotoi i le tapenaina o le fonotaga o le a usuia mai i lo tatou atunuu ma o ia foi o le taitaifono mo lea fono faavaomalo o le a faia i Samoa.
O le lua ai lea o aumalaga mai Malo Aufaatasi ua afea Samoa ona o tapenaga mo lea fonotaga tele. O le faamuamua foi lea o loo ave e le Malo i le saunia o nofoaga e faaaogā mo le fonotaga e lē gata o fale e faia ai, a o nofoaga o le a faaaogā mo nisi o polokalame o le fono.
O le a malaga mai ai foi le faauluuluga o Malo Aufaatasi o Ban Ki Moon ma nisi o ofisa maualuluga o le faalapotopotoga tele lenei o le lalolagi o ona sui o atunuu e 193, lea o le a malaga mai a latou usugafono e silia i le 3,000 e aofia ai tusitala ma tagata faasalalau.
E tāua le asiasiga i le vaiaso nei a sui o Malo Aufaatasi auā o le a mafai ona iloa ai le tulaga ua oo i ai tepanaga a lo tatou atunuu. O se tasi o tapenaga tāua o le itu i le puipuiga e pei ona galulue ai le matagaluega o leoleo ma sui o Malo Aufaatasi e faapitoa i le puipuiga o le saogalemu.
O le tumamā lautele i le faamatagofieina o Samoa e pei ona ave le pitolaau lea i sui o le Malo i afioaga taitasi ma Pulenuu mai afioaga i Sisifo o le taulaga amata mai i le malaevaalele, ma totonu o le talafatai o le taulaga o Apia ina ia faamamā ma teuteu mo malo o le a afea Samoa mai le faaiuga o Aukuso e oo atu i le amataga o le masina o Setema o le a faagasolo ai le fonotaga.
O le tamaitai ofisa sinia o le Matagaluega o le Va i Fafo a Samoa o Perina Sila o se tasi lea o sui o le Malo Samoa o loo galue mo le faamaopoopoina o nisi o vaega tāua i le afea o le atunuu e le aumalaga a Malo Aufaatasi.
