Asiasia e le Afioga Akiepikopo Alapati Mata‘eliga le Puleaga Katoliko Samoa i Brisbane

E tupu malaulau se moemoe fou ae tumau pea faavae auā ua pei o ni ufi e tutupu i tino, ae o se fatu foi e tatupu a‘e i se eleele lelei.
O ni upu faalaeiau na goto ifo i loto ma finagalo, auā o se mauga lava ua fuli ae faaifo le vao a o matamiō le maimoaga a le Puleaga Katoliko a o sasaa faiva o le lupe faalele o le Talalelei e pei ona lolofi atu ai se‘i feiloai ma faafofoga i saunoaga a le taitai o le Ekalesia mai Samoa, Lana Afioga i le Akiepikopo, Alapati Mataeliga Lui.
Na usu faaaloalo le Puleaga Katoliko Samoa i Brisbane i le afiafi o le Aso Lua 23 o Aperila e ala i se ava o feiloaiga, ma sa mamalu ma maualuga le aso i le alalata‘i o le afioga i le Akiepikopo faapea le afioga ia Patele Epati Tamati, le Ituaiga Sa aemaise le aumautofi o le Pulega ma i latou sa molimauina lea faamoemoe tāua ae tainane lupe faalele mai isi tovine.
Na sosoo ai ma le semina amata, a o silamiō le aotelega o vaega eseese a le Ekalesia i le uluai aso i le Palisi a St Paul i Woodridge. Na taualuga i le taumafataga ma taumavae ai le aso muamua.
O le semina faapitoa i le aso na sosoo ai na usuia i le Palisi a Acacia Ridge na faapitoaugafa lea mo tupulaga e toe tapue ai o latou olaga talavou a o faia filifiliga e ofo lo latou soifua mo ni tofiga o le galuega a le Atua e aafia ai le Ituaiga Sa.
O le semina faaiu na faia i Marsden i le aso malolo (ANZAC DAY) na lologo foi le aofia a o malele le saunoaga a lana auauna i le faamalamalamaina atili o le tāua o le Misasa ma ona vaega eseese, ma le galulue faatasi o vaega poo lala uma o le Ekalesia, faapea nisi o vaega tau komiuniti o loo soosoo  tauau ai ma auaumea faatasi i le mafutaga Soofaatasi.
O se aso uigaese ua lē gata i le Puleaga lava ia ae sa mafai foi ona auai susuga i faafeagaiga o le ekalesia EFKS Rev Milo Faaleava ma le Susuga ia Rev Perelini Tauilo ma o la aiga, ma nisi.
Na faaiuina i le osiga o le taulaga Paia o le Misasa na fofogaina lava e lana afioga i le  Akiepikopo, Alapati Mataeliga Lui, ona alo lea i faaaloaloga ma le taumafataga.
Na tofusia faafeagaiga uma ma le Ituaiga Sa i le faatupu. Na tauaaoina atu e le Puleaga ma le afioga ia Patele se meaalofa mo le faigamalaga mamalu e tusa ma le $16,000.00.
O le Fofoga lava o le Puleaga Katoliko, le fetalaiga ia Faamatuainu Ili, sa faaleoina, o ia foi ole Taitai Fono. O le Aso Faraile na toe tuuvaa ai le faigamalaga mo Canberra ma taliu atu ai  i Samoa.