Ua lamalama faaiu le tausaga atoa sa tauaveina ai e le tamaitai lalelei o Metotisi Komiti Faalavaau, le pale mo le Tausala Samoa Niu Sila, e pei ona faapaleina ai i le tausaga talu ai.
Ua toe lua vaiaso ona faia lea o le tauvaga e toe saili ai foi se isi tamaitai lalelei e faaauauina lenei lava pale, ae o loo faagasolo pea nisi o tiute masani o le tamaitai tausala, e faaoo atu ai foi lana fesoasoani i nisi o fanau a Samoa i vala eseese o le soifuaga, ina ia unaia atili ai pea lo latou naunau ia latou tu ma aganuu faa-Samoa moni.
O le Aso Faraile na tea nei, sa amatalia ai le asiasiga a le tamaitai o Metotisi, le Tausala Samoa Niu Sila 2011-2012, i vasega Bilingual a nisi o aoga tulagalua i Magele. O le aoga a Sutton Park Primary, Robertson Primary ma le Viscount School.
O le autū o lenei asiasiga ina ia aoaoina ma luitauina le fanau laiti ina ia lelei ma manino le latou tautala i le gagana Samoa, aemaise ia iloa foi tu ma aganuu faasamoa.
Sa faatalatalanoa foi e Metotisi le fanauiti, ae o le itu mālie le taimi ina ua tuu atu le avanoa i le fanau e fai mai ni a latou fesili, o inā na iloa ai le tele o mafaufauga eseese sa iai i le fanau, e fua ia latou fesili na fesiligia ai le Tausala. O nisi na fia iloa pe aisea na manao ai Metotisi e tauva mo le pale a le Tausala. O isi sa fia iloa po ua fia tausaga o le tamaitai, ma le tele o isi o latou manao sa faailoa ia Metotisi, ma sa taumafai lava le Tausala e faamalie uma fesili a nai fanau aoga.
Sa faia ai foi nisi o faafiafiaga faasamoa a le fanau auā le faafiafiaina o Metotisi ma ē na auai ai, ma na vaaia lava foliga fiafia ma le naunau o le fanau e fia faataitai i le sausaunoaga poo le siva a le tamaitai Tausala.
O le a faaauau pea nei asiasiga a Metotisi i nisi foi aoga tulagalua, a o totoe ai isi aso o lana nofoaiga i le pale o le Tausala Samoa Niu Sila.
