Asiasi i Samoa le faigamalaga a le National Leadership Development

O le Aso Faraile ma le Aso Toonai na tuua ai Brisbane mo Samoa e le faigamalaga mamalu a le National Leadership Development e pei ona usuia ai lea fonotaga i Gold Coast.

O le po o le Aso Lulu ua tuanai na maua ai se avanoa faaauro e faafofoga manino i le mamalu o le atunuu i se saunoaga logomalie ma le manino a le (CEO) Faatonusili o Faamasinoga, Fanua ma Suafa, le susuga ia Masinalupe Tuuu Tusipa. Na ia faapupula ai nisi o tulaga tau faamasinoga i fanua ma suafa aemaise le toe faailoa mai o le tausaga faatulagaina o le matua o le tagata faato‘ā mafai ona pale i se tofi matai lea ua mautinoa e 25 le matua.

E 9 i latou na malaga mai ma o le autū o lea fonotaga o le saga faamauaaina pea o le tomai lautele i tulaga tau taitai e tapena atili ai pe a avea ma taitai o soo se matagaluega.

O nisi na malaga mai e aofia ai Rev Dr Iutisone Salevao (Failautusi Aoao EFKS), Lemalu Sina Retzlaff-Lima, pule o le National Leadership Development Forum, Masinalupe Tuuu Tusipa Masinalupe (CEO Faamasinoga Fanua ma Suafa), Leituala Kuiniselani Toelupe, (CEO Women’s Affairs), tamaitai Loia o Leilani Tuala (CEO Teuteuga o Tulafono), Dr Leasiolagi Malaria Meleisea (Univesete o Samoa), Lava Tupuola Lemalu Malifa, taitaifono o le Samoa Land Development.