Asiasi faalua Vaniah Toloa i Sini

Na toe faafofoga Sini i le siufofoga mālie o le alii pese ia Vaniah Toloa, lea na malaga mai ma le faaili a le “Sons of Samoa” mai Aukilani. O lenei faafiafiaga na faia lea i Parramatta i le kalapu a le Roxy.

 
Sa faasalalau foi e malaga faatasi mai ai ma le alii pese o Zipso ae peitai e lei mafai ona faatasi mai i lea po. E ui i lea o le po o le Aso Faraile, aso 4 o Aperila na faafiafia ai i Perisipeni malaga mai ai mo Sini i le po o le Aso Toonai. Na tuai faafiafia nei alii pese i le taimi o le vaveao pe tusa ma le ‘afa o le tasi i le lua a o le taimi lea ua lē mafai le aumaimoa i le fia faafofoga ia Vaniah. O le alii ta piano iloga mai Aukilani ia Hemi Solomona se tasi o sui tuai na auai mai.

 
E ono pese malolosi lava na usu e Vaniah i lea po ae pepese faasoloatoa ai ma le aumaimoa e pei o le “O oe o le Toa,” “E le Galo Oe,” aemaise le pese numera tasi o le “Samoa e, Maopoopo mai.”

 
O le alii pese iloga lenei na aami faapitoa mai Samoa i le 2009 mo le tatalaina o le Polynesian Umu Cooker faapea le usuina o le vii, O oe o le Toa i le tufaga faailoga a le Samoa Sportstar Awards ma le FM89.3 (2009) i Sini ma Melepone.

 
Na uma lenei faamoemoe i le 2009 malaga i le aso e sosoo ai Vaniah i Siamani e fai ma sui o Samoa i se faaaliga o atunuu a le lalolagi na faia i lea tausaga. E molimau le atunuu o fatuga lava (original) a Vaniah Toloa e eseese mai ai lana taleni mai le toatele, ma o se avanoa e faalogo foi i ai tama ma teine pese atiae a Sini ma Perisipeni i lenei alo o le atunuu ma mātau nisi o ana metotia.

 
Sa maua foi e Vaniah le faailoga o le tamapese  a le Pasefika i le tausaga talu ai, ma o se mitamitaga i se alii na soifua mai Samoa mai afioaga o Faleasiu, Apia/Vaisigano ma Tokelau. Na aoga o ia i Avele ma vaaia ai loa le tulai mai i le taleni faafiafia.

 
O lea lava po na lagolago ai foi e alii pese i Sini ia DSS, Dr Tua, ma alii DJ’s ia Loudmouth Len, Tikelz, Meka, Rockwidit & Superb. O nisi o alii pepese na molimauina lenei faamoemoe e aofia ai King Faipopo mai Sini, Darwin Selesele, Tee Ofisa Toleafoa ma Tui Eddie Taualapini mai Aukilani.

Nisi o alii pepese sa auai faatasi i le faafiafiaga i lea po faatasi ma Vaniah Toloa .