Sa faafiafiaina le tamaitai Faatonu Sili o le Aoga Amata a Leataata o Tupulaga mo le Lumanai o Samoa ma le Pasefika, le faletua ia Leata Tipi, faapea le pulega o le aoga, ina ua maua ane se faaaliga o le a afea e le tamaitai faipule, o le Sui Taitai foi o le vaega faaupufai a le Labour, la latou aoga.
O le tamaitai faipule o Annette King ma se tasi o sui o le vaega faaupuafi, Phil Twyford, o i laua ia sa asia lea aoga i le itu i Sisifo o Aukilani.
O le Aoga Amata a Leataata o Tupulaga o le Lumanai o Samoa ma le Pasefika, sa mafua ona asiasi i ai le tamaitai faipule ma sui o le Labour, ona o se tasi o Aoga Amata sa maoa‘e lona tulai mai i le faatinoina o galuega ma tiute mo le a‘oa‘oina o le fanau laiti, poo Aoga Amata lava.
O faamaumauga tusitusia ma nisi o lipoti a le tino o loo nafa ma le vaaia o Aoga Amata, sa molimauina ai le tulaga siitia ma le maualuga o le atina‘e o fanau mai lea aoga.
E lē gata i le a‘oa‘oina o le fanau, a o le tele o isi polokalame e aofia ai mātua ma tagata lautele o loo faaauau ai le fesoasoani mo tagata lautele.
O se tasi lea o tulaga tāua tele ma le amanaia, ona o tautua aoga e faatatau, ma penefiti ai tagata lautele, aiga ma fanau.
O le lotoifale i galuega faatino ma lona siosiomaga, faapea ai ma faiaoga, o nisi foi ia o vaega e sili ona faatāuaina mo le atina‘eina o fanau laiti.
Sa filifilia foi le Trust a le aoga, i totonu o le lisi mulimuli e saili ai le manumalo i tufaga faailoga mo pisinisi, Business Award 2011.
O le tasi lea matati‘a ua ausia lea taumafaiga ma lea auaunaga a tagata Samoa, mo Samoa ma le Pasefika.
O le faaiuga o le tausaga nei o le a faalauiloa ai, poo ai o le a manumalo i lea foi tauvaga e pei ona ofi atu i ai Leataata o Tupulaga Trust, o loo faatautaia ma faatonusili o le aoga amata a Leataata.
O vaega uma ia sa mafua ai ona faagaeetia le tamaitai faipule ma faamauina ai lona fia asiasi ma fia feiloai i le faauluuluga ma faiaoga, faapea fanau aoga. O se pine faamau o le agaga o le Labour ma le vaega ina ia tapue atili, ma ia saga tilotilo pea i ai, mo nisi manaoga manaomia o aoga a le Pasefika ma Samoa.
Sa auai foi talafou i lea asiasiga faapitoa, ma sa molimauina ai vaega uma na talanoaina ma faapogai o le asia o le aoga.
Saunoa le faletua ia Leata Tipi, o le faauluuluga o le aoga, lona fiafia tele ona o le amanaia ma le afea o le auaunaga e le taitai lagolago ma le vaega faaupufai, ma o se faamalosiau mo faiaoga ma le fanau e latou te iloa ai le amanaia o latou i totonu o Niu Sila.
Ae lē gata i lea, ia iloa e tamaiti e tāua tele i latou i aiga, ekalesia ma le faalapotopotoga o tagata lautele e oo lava i sui mamalu o le malo.
