Ua toe foi se aumalaga o faipule o le Palemene a le Malo o Ausetalia na asia Samoa mo le vaiaso atoa ua tuanai.
O se asiasiga na lē gata ina maua ai ma le avanoa e faatalatalanoa ai i se fonotaga ma faipule o Samoa pulega lelei faataitai o Malo, ae na faapea ona o latou asia ai nofoaga na faamatuu mai ai ni fesoasoani a lea Malo ona o le afā o Eveni.
O le afioaga o Magiagi na asia e lea vasega o faipule atoa ai isi vaega o le atunuu na aafia ma o loo feagai pea ma galuega tau toe faalelei, ma o le tamaitai o loo vaaia le vaega o tali i faalavelave faafuasei, o Filomena Nelson na auai atu e faamanino nofoaga nei aemaise o fesoasoani ua tuuina atu ia i latou o loo matuā faaleagaina o latou fanua ma maota ona o lenei faalavelave faalenatura.
Na faapea foi ona asia e ia alii ma tamaitai nofoaga o loo faatupe e Ausetalia i atinae eseese aemaise lava i aoaoga. O se tasi o ia nofoaga o le Kolisi mo Aoaoga i Matata eseese a le Malo o Ausetalia lea ua faatū lona lala i Samoa nei lea e faaigoaina o le APTC (Australian Pacific Technical College).
O loo aoaoina ai le tele o tomai e faafaigofie ona maua ai galuega a le toatele o Samoa e lē o iai ni faailoga taualoa mo le saili ai o ni galuega. O le maua o tusipasi i ia aoga o le a faapea ona mafai ai foi ona saili galuega a alii ma tamaitai e faauu mai ai i isi atunuu aemaise lava i Niu Sila ma Ausetalia.
O loo iai foi ma isi alii ma tamaitai mai i isi atunuu o le Pasefika i lenei aoga ma o se avanoa lea na asiasi mai ai faipule e silasila i se tasi lenei o atinae tele a le Malo o Ausetalia i atumotu laiti o le Pasefika.
O le feiloaiga ma faipule o Samoa na mafai ona faasoa ai nei faipule i galuega ua latou faatautaia aemaise o le manaoga ina ia lelei ma atoatoa auaunaga faafaipule aemaise o le aloese ma auala faaālatua ua aafia ai galuega a le tele o faipule i atunuu eseese o le lalolagi.
O galuega fai faatasi a faipule o Palemene ua mafai ona faatautaia i tausaga taitasi aoaoga faapenei ma asiasiga e pei ona faatupe ai e le Ofisa o le Faalapotopotoga o Malo o le Taupulega (Commonwealth Secretariat), peitai o le asiasiga lenei ua patino lava i faipule o Ausetalia ma ua faatupe lava e lona malo ia asiasiga e pei ona aofia ai ma le asia o nofoaga o loo faaauau ona fesoasoani iai lenei malo i atumotu laiti.
