Asia e leoleo falepuipui Ausetalia, Tafaigata

O ni sui o le falepuipui o Arthur Gorrie i Brisbane i Ausetalia na talimalo ai le Matagaluega o leoleo, falepuipui ma Tineimu i lenei vaiaso ma na ta’ita’i e le afioga Taulapapa Lemalu Roy Slade lenei faigamalaga o alii ma tama’ita’i ua tele tausaga o galulue i falepuipui.
O lo latou oo mai i Samoa sa auai i le fono tele faa le tausaga a le Toomaga mo e Puapuagatia ma ua avea lea ma avanoa e talosaga ai se asiasiga i le to’ese i Tafaigata.         O lea la na mafai ona aumai le faatagaga ma na afio atu lava le Minisita o le Matagaluega e faafeiloai ia i latou ma faamatala iai le tele o le eseesega o le vaaiga o pagota i Samoa nei pe a fuafua i le vaaiga foi o tagata taofia i Niu Sila poo Ausetalia foi.
Faaalia e le afioga Taulapapa e malosi lava le puipuiga i nofoaga e pei o Ausetalia aua ua mautu ma e to’atele i latou i falepuipui, o le faataitaiga e silia i le to’a 900 o loo taofia i le to’ese lava lea i Brisbane i le itupa lava ia o alii peitai o le falepuipui i Tafaigata e le oo i sea to’atele.
E tele faafitauli ua laga i lipoti i le falepuipui i Samoa peitai na ta’ua e le aumalaga e leai lava se eseesega i tulafono o le nofo taofia ai o pagota ae atonu o ni tulaga nei e vaavaai lava iai le pulega ma faaleleia i le faagasolo ai i luma o le auaunaga ma o le latou sao ua ofo atu i le falepuipui i Tafaigata o le maua lea o fesootaiga e faasoa ai le auaunaga aemaise o nisi auala e mafai ona ofo mai ai le fesoasoani a i latou i Ausetalia latou.
O le faafetai a le alii Minisita le afioga Sala Fata Pinati, ona o lea ua amata le fesootaiga ma ua mafai ona iai ni talanoaga ua faatautaia nei ma na ta’ua e nisi o leoleo o le to’ese mai i Ausetalia na malaga asiasi muamua mai i ni tausaga ua tuana’i ua matua tele le suiga i galuega ia ua toe faaleleia ai le toese a tamaitai aemaise o vaega o le toese a alii ma ua tele se fale ua malolo iai pagota mai i a latou galuega.
O le taimi lenei o loo faamalolo le tumau mo masina e fa le pule o le falepuipuj i Tafaigata ona o suesuega i nisi o faitioga ua oo ai ni tusitusiga i le Palemia ma le Kapeneta. Ua faamalolo atu ai foi ma le Komesina o Leoleo mo le umi lava lea ae o loo totogi pea i le faatali ai o se suesuega ua faatautaia nei faasaga i faitioga e pei ona ta’ua.
O le manaoga o le Malo ia mae’a lelei sailiiliga o nei faitioga e aunoa ma le iai o taitai nei e lua i totonu o le matagaluega a’o faatautaia.
E ui o lea, ua ofo mai le tau’au o leoleo o falepuipui o Brisbane ma le latou foi fuafuaga e faaauau lenei fesootaiga ma saili foi ni fesoasoani o loo moomia e Samoa e mafai ona ofo mai ai le latou tautua.