E faitau sefulu miliona tala Samoa le tupe na tauaao aloaia mai e Malo o Niu Sila ma Ausetalia i le tausaga na tea nei e totogi ai pili aoga o tamaiti Samoa e aooga i aoga laiti a le Malo. Aoga ia e amata mai tamaiti i le lima tausaga le matutua seia oo atu i le 14 tausaga.
O lea la ua i Samoa sui o Malo e lua e asia le faaaogāina o lenei tupe pe o alu sa‘o foi i aoga lenei fesoasoani tele a nei Malo. O le taumafaiga a le Malo o Samoa e pei ona amata faamamalu ai nei le aooga uma o fanau i le matutua ua ta‘ua i luga, lea na ofo mai ai loa lenei fesoasoani tele.
O le taimi lenei soo se tamaititi e aoga i aoga nei a le Malo e totogi atu i lalo o le tupe lenei le $100 a le tamaititi e toatasi.
O le aofai lava la o le aoga o le aofai foi lea o ta‘i $100 e totogi i le aoga ma o le tupe lea ua faaalu e totogi ai manaoga o soo se aoga a le Malo i le faatinoga o aoga i aso uma.
Ua totogi ai pepa o masini computers, totogi ai computers ma masini lolomi printers, e lē gata i lea o ea malulu o isi ofisa o aoga. Ua totogi ai ma pepa ma api auā lava le faaaogā i taimi o suega a le fanau.
O le totogi o faiaoga o loo faatautaia lava e le Malo o Samoa. O Komiti a Aoga o loo tuufaatasi ma le Pule aoga faapea faiaoga i le faasoasoaina o lea seleni i tausaga uma.
O loo faaauau ona lafolafo mātua i totonu o se isi faaputugatupe ma ua vaaia e le Komiti o Faleaoga a nuu taitasi ia teugatupe, o le seleni lea e pei foi ona toe faamalamalama i lenei vaiaso, o le a faapea ona alu i le faaleleia o faleaoga ma lotoā o loo taaalo ma malolo i ai fanau.
O isi nuu ua lē faia teugatupe nei ae ua faatino lava e faalapotopotoga i totonu o afioaga taitasi ia galuega e pei o Autalavou, o Komiti a Tina poo le Malosi foi o se afioaga.
O le faamoemoe ina ia aua ne‘i iai se taimi e toe faapea mai ai mātua ua lē mafai ona ave fanau i aoga ona o le leai o se tupe.
O le aoga a Vaimoso lea na afea foi i lenei asiasiga ma na tele se taimi o sui nei o Malo e lua e asiasi ai i potu aoga ma maimoaina galuega o loo faatino a faiaoga ma le fanau.
Na umi foi se taimi o talatalanoa ma sui o le Komiti a le Nuu lea e iai le afioga i le Masiofo ia Pula Matai‘a Visesio ma na mafai ona fofogaina ai foi e nei sui le mafuaaga tonu lava o le fesoasoani ona ua iai nisi komiti e manatu e tatau ona alu le tupe lenei mo le faaleleia o faleaoga.
O le seleni lava ia na ta‘ua e nei alii e mo le faatinoga o galuega i totonu o ofisa o aoga. E lē mo le moaina o le vao poo le toe fausia o potu aoga ma e tatau ona maioio lelei lea tulaga e pei foi ona malilie ai sui nei o le Komiti o le Faleaoga a le Aoga a Vaimoso.
Na ta‘ua e alii nei le lelei faasoa o lenei tupe ma o se fesoasoani e faaauau lava ae e faamoemoe lava i le faamaoni o i latou o loo avatu i ai le tupe mo le faasoa lelei i ofisa o aoga.
O le tausaga lenei ua faamalosia ai le ave o mātua i le Faamasinoga i le lē avea o fanau i aoga – o fanau ia mai i le lima i le 14 tausaga le matutua.
O le faamoemoe ina ia mafai i se taimi o i luma ona faalautele atu le matutua i aoga maualuluga i le atunuu.
E toe taliu atu i Niu Sila ma Ausetalia nei sui i le faaiuga o le vaiaso nei.
E iai aoga o loo totogi lava pili o fanau e pei o le Aoga a le Apia Primary School ona o le vaega o le tupe lea e maua atu i pili e ui o lea ua ‘afa le tupe sa masani ona totogi ona e iai alauni e totogi e le Komiti a le Afioaga i faiaoga o le aoga tulagalua, lea talu ai le manaoga ina ia unai pea a‘oa‘oga i lea aoga a le Malo.
E $70 la e totogi e le tamaititi i le tausaga ae sa $120 sa totogi i le kuata a o lei faatino le fesoasoani lenei a Niu Sila ma Ausetalia.
O isi aoga o loo totogi lava pili aoga, o aoga a lotu atoa ai aoga umia pe pulea e tagata taitoatasi e pei o le Peace Chapel ma le Aoga a Robert Louis Stevenson.
