Ua iai nei le finagalo o alii ma faipule o le afioaga o Tanugamanono e tuuina atu se latou talosaga i le faamasinoga o talosaga apili, ina ia toe iloilo ai le faaiuga ua mae‘a fofogaina e faasino i le vaegatupe e 982 afe 295 ($982,295.00) tala e totogi e nisi o matai o le nuu i le aiga o le tina o Afu Faumuina Tutuila.
O lea vaegatupe tele e latalata i le miliona tala ua mafua ona faia i ai le faaiuga a le faamasinoga, ona o meatotino a lea aiga na faaleagaina ina ua tulai mai se feseeseaiga ma alii ma faipule o le nuu, e mafua i se finauga tau fanua o loo tu ai le maota o le ekalesia EFKS ma le maota o le faafeagaiga.
Na faaalia e le loia sa finauina le tagi a le aiga o Afu Faumuina Tutuila ina ua mae‘a ona aumai le faaiuga a le faamasinoga maualuga, a lē mafai e matai ua faatonuina e totogi le vaegatupe o le taui ma mea na faleagaina, e iai le malosiaga faaletulafono i le ofisa o faamasinoga e avatu ai ni meatotino a i latou na faasaga i ai le tagi e faatau e saili le tupe atoa ua manumalo ai le itu tagi.
I se pepa o faamatalaga na tuuina mai e se tasi o matai o Tanugamanono, le afioga Tupuola Terry Tavita, o loo faaalia o le Aso Gafua, 25 o Iuni 2012 na fono ai le nuu, ma o se fonotaga sa auai ma le loia o loo tauaveina le finauga a le afioaga, o Rosella Papalii, i le fia faamalamalama ma faapupula mo le silafia e alii ma faipule o le iuga a le faamasinog.
Sa faamatalatala ai foi nisi auala faaletulafono e mafai ona uia e le nuu. O le mae‘a o le faatasiga na auautasi ai le Fono a Alii ma Faipule o Tanugamanono, e tuuina atu loa lenei mataupu i le Faamasinoga o Apili.
Ua tapa foi le tamaitai loia e faagaoioi loa le talosaga apili. Ua faamaonia mai e le tamaitai loia mo le afioaga lea tulaga, ae e leai sona silafia e faia se faasalalauga a le nuu e faailoa ai lea fuafuaga.
Ua faaalia i le faasalalauga faalauaitele mai matai o Tanugamanono, ua faavae le faaiuga a Alii ma Faipule i le talitonuga maumaututu, e le o amiotonu le faaiuga a le faamasinoga, ona o se iuga e lutia ai Pulega Mamalu a Alii ma Faipule, solipala ai faiga faamatai ma oia ai faavae o nuu ma alalafaga.
O le fonotaga i le Aso Gafua na tapa ai foi e matai le tamaitai loia e faaulu se talosaga i le Faamasinoga o Apili ina ia tofia se faamasino Samoa fainuu e seei i le iloiloina o taualumaga o le latou mataupu.
O le finagalo o alii ma faipule ua faaalia ai, e tāua lea tulaga ona o loo taoto i le ogatotonu o le mataupu lenei aganuu ma agaifanua ma faiga faavae o nuu ma afioaga, e manaomia ai se faamasino e silafia ma malamalama lelei i tulaga o le aganuu faasamoa ma pulega faamatai.
