“E le tatau ona toe misia se aso aoga”
O le polokalame a le Malo e auala mai i le Matagaluega o Aoga, Taaloga ma Aganuu mo le totogiina o pili aoga o fanau, o le a aofia uma ai tama ma teine i aoga tulagalua uma a le Malo faapea aoga tulagalua a ekalesia ma aoga mo fanau e iai manaoga faapitoa.
Ua faailoa e le matagaluega o aoga lea faaiuga a le Malo i se mafutaga ma sui o komiti o aoga tulagalua a le malo, o Pulenuu o faatonu o aoga a ekalesia, ma sui o aoga mo fanau e iai manaoga faapitoa sa usuia i le amataga o lenei vaiaso fou.
O le feiloaiga lea ua folasia ai e le matagaluega o aoga le faagaioia o le polokalame mo pili o aoga, e pei ona laugatasia uma ai fanau i le pili aoga e selau tala mo le tamaititi e toatasi, o le a totogi i lalo o le polokalame faaopoopo i ai ma vaega tupe ua fuafuaina e fua i le aofaiga o tamaiti i se aoga tulagalua.
O le feiloaiga lenei ua faamalamalama atili ai le faaaogaina o vaegatupe o le a maua i le polokalame, atoa ai ma le tuuina atu o aiaiga ua faatulaga e le matagaluega o aoga e tatau ona mulimulitai ai aoga uma, e pei o le ave o tupe e faaaoga mo vaega uma e aoao ai le fanau, ae o isi atinae e pei o le fausia o ni faleaoga fou poo le fia maua o ni tane vai, o le a nafa lea ma komiti a aoga faapea matua.
O nisi o vaega e totogi i lalo o le polokalame o pili o le eletise, o le suavai pe afai e $800 tala le pili i le tausaga.
E le totogia ai ni nonogatupe poo aitalafu, pe faatau ai ni togi mo laugatogi, moa ai le vao, fau ai le pa o le faleaoga pe faatau ai ni taumafa mo faiga suega.
Na faapupula e le Pule Sili o le matagaluega, le afioga Galumalemana Nuufou Petaia, e alu lava le fai suega e faatau lana mea taumafa.
O le a faaauau pea le polokalame fesoasoani lenei a le Malo pe a maea le tolu tausaga o le fesoasoani a Ausetalia ma Niu Sila mo le faatupeina faatasi ai ma le sao o le Malo o Samoa.
E le o aofia i lenei polokalame, aoga tumaoti poo private schools e pei ona faamalamalama mai e le tamaitai Pule Sili le mafuaaga.
Tulafono faamalosia le aooga o fanau
Ua pasia e le Palemene le tulafono e faamalosia ai le ave o fanau uma a le atunuu i le aoga, lea o le a amata faamamalu le tulafono i le aso muamua o le masina fou o Fepuari pe a toe amatalia aoaoga o lenei tausaga e pei ona faailoa e le Matagaluega o Aoga, Taaloga ma Aganuu, lea faaiuga a le Malo mo le silafia e le atunuu atoa.
Ua talosagaina ai le galulue faatasi o tagata uma aemaise matua o sui o komiti o aoga, ma pulenuu faapea ekalesia i le faamalosia o le tulafono.
Ua aiaia faasalaga mo matua ma tagata ua ave i ai le vaaiga o ni fanau pe afai latou te le tausisia ma usitaia le tulafono.
O se laasaga taua i le talafaasolopito o lo tatou atunuu i le itu tau aoaoga e pei ona lagolagoina e Samoa le manulauti faavaomalo i le tatau lea ona oo atu i le tausaga e 2015 ua aooga uma o fanau, aemaise o le faamalosia o le ave o tamaiti ua oo le matua i le va o le lima ma le 14 tausaga le matutua.
O le feiloaiga a le matagaluega ma sui o aoga tulagalua a le Malo ma ekalesia ma aoga faapitoa, aemaise o pulenuu na faalauiloa ai foi ma le polokalame fou o le aoaoina o mataupu o le faatuatua Kerisiano i aoga uma a le Malo e amata i le tausaga nei.
Ua pasia e le kapeneta le polokalame mo le faatinoina o lea faamoemoe lea ua taatia i se komiti latou te taulimaina lona faatinoga.
Ua iai le fuafuaga e faia ni aoaoga faalauiloa o lenei suiga fou o le a auai pule aoga, o asiasi aoga, pulenuu, ma faifeau o nuu ma afioaga faapea ni faifeau e le o tausinuu ma aoao fesoasoani e saga soalaupule ai lenei mataupu.
Faaalia e le Pule Sili lagolago o le matagaluega o aoga, na fofogaina se pepa e faamalamalama atili ai le faamoemoe le susuga i le faifeau o Mose Fulu, o le a agai le aoaoina o lenei mataupu i le faaolaolaina atili o aga tausili poo Christian ethics and values. O le a faamalosia foi le tatau ona faia lotu a o lei amata le aoga, aoao le silafia o le taua o le anapogi, o le faaaloalo, usitaia ma loto maulalo, le onosai, ma le loto faamagalo, aemaise le aoaoina o le amio solia ma le tauagafau.
O le a mataitu e le komiti le le tatau ona faaofiina i nei aoaoga se talitonuga o se ekalesia se tasi.
O loo naunau le matagaluega e iai ni faiaoga aoaoina lelei mo lenei mataupu. Faaalia e le susuga Mose Fulu o le komiti ua filifilia, o le a latou tusia se alafua e aoaoina ai lesona o le talitonuga Kerisiano i se tulaga manaomia ma le talafeagai.
