O le amataga lava o le saunoaga a le Alii Palemia i lana fonotaga i le faaiuga o le vaiaso na tea nei ma tusitala, e faamalo ma faafetaia taumafaiga a le tamaitai ia Penina Marie Paeu i le ofi atu ai i le tauvaga tausala a le Lalolagi lea na faatoa foi mai ai i Indonesia.
O se tauvaga e masina atoa lava o agai atu i ai lenei tamaitai e fai ma sui o Samoa ma o le taimi muamua lea i le silia i le 20 tausaga talu ona toe ofi atu se tausala o Samoa i lenei taumafaiga faavaomalo.
O le tulaga o le sui o Samoa, le tamaitai ia Penina na ausia ai le tulaga 17 mai i le aofai e toa 132 o tamaitai o le lalolagi na auai ma tausinio i lenei tauvaga faigata. O se laasaga maoae aemaise ai o lea faatoa toe ulufale atu Samoa i lenei faamoemoe.
O se faatalatalanoaga na toe agai ai foi le alii Palemia, le Minisita foi lea o le Pulega o Tagata Tafafao mai fafo i le mafuaaga tonu na a‘e ai se tofa i tausaga ua mavae e faatuina loa se Faaaliga tausala o le Pasefika.
O le mau a le Alii Palemia, e tele atu le avanoa e manumalo ai se tamaitai o le tatou atunuu i lea faaaliga ma fai ai ma sui o le itulagi o le Pasefika e malaga i soo se vaega o le lalolagi e fai ma sui o atunuu laiti nei. E tutusa lava foi la le sao atu ma maua ia avanoa ma le tamaitai e manumalo i le sailiga o le Tausala o le Lalolagi.
Faaalia e le alii Palemia a o agai atu Samoa i tausaga ua mavae i le tausala o le lalolagi, e lei faamanuiaina lava i nei tauvaga ae o le tausala o le Pasefika o lea lava na maua le avanoa o tamaitai Samoa e tulai mai ai e fai ma sui poo le lalelei o lenei itulagi atoa.
E faamuamua lava le manatu o le afioga i le Palemia, o le tamaitai e tatau ona alu i le tausala o le Pasefika poo le tausala o le lalolagi e tatau ona lelei le nanu ona o le itu lea e moomia le malamalama i fesili e tuu atu i ai.
O lea la ua tuu atu lava e le Pulega i le vaega lea o loo tapenaina i latou e tauva mo le Miss World Samoa lea taumafaiga i tausaga taitasi ae o le faamuamua ua ave lava i Samoa i le tausala a le atunuu ma le tausala a le Pasefika.
“O teine la e tatau ona agai i le tauvaga lea o teine e tino vale,” o le ata lea a le Alii Palemia ma tali ane i tusitala.
“E aogā i ai le vaega la e agai i fale faamalositino, aualii ia e fia paeee ma le vaega ia e faatimu i luma o fale Samoa o le Pulega o tagata tafafao mai fafo i le Eleele fou,” o sana saunoaga lea.
O le Atu Solomona lea e faatautaia ai le tauvaga tausala o le Pasefika i lenei tausaga i le masina o Novema.