O se tasi o polokalame mo galuega fesoasoani i le Pasefika, le Pacific Partnership 2009, ua mautinoa le tele o lona aoga i ni faafitauli e tulai faafuasei, e pei ona laveaia ai le ola o se tamaititi Samoa e na o le lua ona tausaga, ina ua ia maua vave se fesoasoani mai ni fomai o loo iai i lea polokalame, a o faia a latou galuega fesoasoani i Lalomanu i Samoa, i le aso 3 o le masina lenei o Iulai.
Taua e le fomai o le Fuavaa a Amerika (U.S. Navy) lea na togafitia le tamaititi, sa aafia lenei tamaititi i se faaletonu lea na tata ma alu ai lona manava sei tulou, ma sa iai i se tulaga na sili ona lamatia ai lona ola ona ua tele le suavai e alu ese mai le tino.
Taua faapea e faasefulu taimi o taumafai e tui se IV i le tino o le tamaititi aua ua matua leai se vai i le tino peitai e lei taulau, ma faatopetope ai loa se taotoga na faia ai lava i Lalomanu e nei fomai, ina ia mafai ona tui le IV, ma na manuia lena taotoga faatopetope, ma mafai ai loa ona toe maua mai se malosi o le tamaititi e ave ai i Apia i le Falemai tele i Motootua.
Ua faamaonia mai e le vaega o fomai i Motootua, ua toe tea i tua lenei tamaititi ua malosi. O se itu na faafetaia ai e le Deputy Commander a le U.S. Pacific Fleet Rear Adm., Robin M. Walters, i latou uma sa galulue i le laveaia o le ola o si nei tamaititi, i le vave o le faatinoga o le auaunaga laveai, aemaise foi le soosoo tauau mai o le vaega o fomai i le matagaluega a le soifua maloloina i Samoa.
Saunoa Walters, o le agaga tonu lea o lenei polokalame, le Pacific Partnership 2009, ina ia tuuina atu i tagatānuu o Samoa se fesoasoani o loo moomia i soo se vaega o le soifuaga.
O le Pacific Partnership o se misiona poo se polokalame ua taulai atoatoa atu i galuega alofa ma fesoasoani i le soifua i aso taitasi, ma e galulue faatasi pe faaauala atu foi a latou fesoasoani i atunuu, o faalapotopotoga tumaoti, faapea ma isi faalapotopootga a le Iuanite Setete ma isi malo o le lalolagi, ma e agai le tele o a latou fesoasoani i motu o le Pasefika.
I lenei tausaga, o loo femalagai solo ai le Pacific Partnership i atunuu o le Oceania, e aofia ai Kilipati, Republic of the Marshall Islands, Samoa, Solomona ma Tonga.
