O le mae‘a ai o le fonotaga faavaomalo i le va o Matagaluega o le soifua maloloina i Amerika Samoa ma Samoa Tutoatasi lea sa usuia i Apia i le vaiaso ua mavae, ua lagolagoina ai e usugafono a matagaluega e lua, o le taaloga bingo le isi mafuaaga o faama‘i lē pipisi.
O le mau a se tamaitai tausi soifua sinia mai Amerika Samoa na folasia i le fonotaga, na ia faaalia ai o le tele o taumafa eseese o loo faatauina i totonu o nofoaga o faia ai taaloga bingo ua mautinoa o loo faatupulaia ai ma tagata e aafia i le tino puta ma le toto maualuga, o nisi o faama‘i lē pipisi e mafua mai suiga o le soifuaga.
O le mau a le tausi soifua sinia, e ao i matagaluega a Samoa e lua ona silasila i ni faiga talafeagai e puipuia ai le soifua o i latou o loo fiafia i le bingo ma faia ni tulafono e faatonutonu ai le faatauina o ituaiga o taumafa i nofoaga o faia ai ia taaloga faitupe. O le mau a se tasi o fai pisinisi i Samoa ua lē finagalo e faailoa lona suafa, afai o le a iai se fuafuaga faapea, o le a ono aafia ai le aiā tatau o tagata e faia ai lana filifiliga saoloto i se taumafa e manao i ai.
Peitai o le fonotaga ua mae‘a nei a matagaluega o soifua maloloina i Samoa i Sasa‘e ma Samoa i Sisifo ua autasi ai usugafono ia aofia ia latou fuafuaga mo sini e fia ausia i le tausaga e 2025, le faia o ni aiaiga ia mautinoa e lē afaina ai le saolotoga o le tagata e filifili ai se taumafa e fia tausami ai i totonu o nofoaga o taaloga bingo.
O le itu mautinoa e lē tau fesiligia le anoano o taumafa o loo faatau i nofoaga nei, aemaise lava taumafa o loo ilitata i ai le soifua maloloina e tele ai le suka ma le ga‘o faapea le masima.
O le isi itu sili ona lē sogalemu mo le soifua maloloina o tagata e agai i fale bingo, o le ulaula tapaa e pei ona molimauina o loo faataga lava ona ula sikaleti a tagata ulaula tapaa i le taimi o loo faagasolo le bingo.
Ua faaalia o se solitulafono lea i lalo o aiaiga o le tulafono o le tapaa lea o loo tapu ai pe faasā ona ulaula nisi i nofoaga faitele e pei o fale o loo faia ai bingo. E lē o asiasia e le matagaluega o le soifua maloloina lea tulaga ae e iai le talitonuga, a oo loa ina faia ni aiaiga mo nofoaga o faia ai nei taaloga o le a mataitu loa ma taofia.
O nofoaga faapea i isi atunuu e pei o Niu Sila e faia ai taaloga faitupe faapea e pei o le housie, sa taga ai le ulaula tapaa, peitai na faia suiga o tulafono a ia atunuu ma faasā loa ona toe ulaula nisi i le taimi o ia taaloga, ae ua iai lava le taimi e faia ai le malologa ae agai le au ulaula tapaa e faatino le latou masani ona toe agai lea i fale o loo faia ai nei taaloga mo le faaauauina seia oo ina mae‘a. O loo talosia e nisi o sui ma ofisa sinia o le soifua maloloina ia iai ni aiaiga faapea i le fuafuaga o le a agai i ai e faatino i se taimi.
