Ao uma e le Aute Samoa Ipu e fa o taamilosaga tapolo

E fitu kalapu ta polo sa tausinio i le taamilosaga mo le ipu a le toeaina ua maliu, Leuatea Iusitini Sio.
O le taamilosaga sa faataunuuina i le malae o le kalapu a le Airport Aviation i Magele. O le kalapu a le Aute Samoa, sa manumalo ma umia lea faailoga mai le tausaga talu ai.
O le maea ai o le taamilosaga o le tausaga nei 2009, ua toe manumalo ai le Aute i lea ipu sa latou puipuia.
O nisi o taamilosaga tapolo sa faataunuuina i le tausaga nei, sa tausinio i le ipu a le Tapaau Faasisina, Malietoa Tanumafili II, sa faia foi i Aukilani i le malae lava lea e tasi.
E sefulutolu kalapu mai Samoa, Ausetalia ma Niu Sila sa auai, o le faaiuga o lea foi taamilosaga sa manumalo ai le kalapu a le Aute ma latou aveesea ai le ipu mai le kalapu a Sini i Ausetalia sa latou umia mai le tausaga ua mavae.
Na maea lea ona sosoo ai lea ma le taamilosaga sa faia i Palmerston North, i le masina na tea nei.
E fitu foi kalapu sa tausinio, ma e lua ipu sa tauva i ai. O lea taamilosaga e na o kalapu a Niu Sila sa tausinio, e lei iai ni au mai fafo.
O le ipu a le Komisi o Samoa i Ueligitone, ma le ipu a le Konesula aoao o le malo o Samoa i Aukilani.
E ui ina taufai malolosi uma au e fitu o le taamilosaga, peitai sa maualuga lava le faatinoina o le taaloga e le Aute Samoa ma toe faamanuiaina ai foi, ma umia ai ipu uma e lua.
O lona tolu o taamilosaga faagasolo o lenei tausaga i le kalena a asosi Samoa uma i Niu Sila, ua toe faamanuia ai foi le kalapu a le Aute.
O le taimi nei ua fa ipu o loo umia nei, e pei ona faamaonia mai e le Peresitene o le Aute Samoa, le susuga ia Tavai Meni.
O loo faagasolo pea taaloga o le tausaga e lei maea, ao le moemitiga a le kalapu, e fia manumalo i isi foi faailoga mai taaloga o totoe o le tausaga 2009.
O le polokalame faataatia a le Aute mo masina o totoe o lenei tausaga, ua faamoemoe o le a tuufaatasi uma tamalii, failauga, aumaga faapea foi tina ma tamaitai o le kalapu, i se taumafataga tele ua fuafua e faauma ai galuega ma taaloga sa feagai ai i lenei tausaga atoa.
Ua iai le faamoemoe o lea taumafataga tele, o le a tufatufa ai ma faailoga e faalauiloa ai i latou sa mau faailoga ma tele so latou sao, mo taamilosaga eseese, ua mafua ai ona sitia le tulaga o le kalapu i lenei tausaga.
E le gata i lea o se taimi foi e fiafia faatasi ai le autaaalo ma le autapuai i aiga, uo ma e masani, ma faamanuia ai le oo mai o le Kerisimasi.