E lē o matua iloga mai ile talanoa ale ta’ita’i ole malo poo ai tonu lava lea nate tuua’ia ile anapopogi pepelo.
Ole ta’ua ole anapopogi e pei ona faia ile amataga o tausaga uma ele Malo ma Ekalesia Kerisiano mo le filemu ma le saogalemu o Samoa, lea na toe faamanatu mai ele taitai ole malo, le afioga ile Palemia, TLSM Tuilaepa Lupesoliai Sailele Malielegaoi, e leai lava se isi e faapa’ole iai: “Ole ā le silasila mai ale Atua ile tatou atunuu ile mea e tatau ona tatou faia, e fai aku e anapogi ae lē anapopogi.”
“Ole ta lea na aumai ose tamai ta, e na’o le tasi na oo iai, ia ma le lua ae ua mamao atu ma tatou. Masalo ole mea lena e faamanatu mai, e soia tou te talapepelo ile Alii, e leai se isi e pepeloa le Atua”
Ole tāua foi ole anapogi ona oloo auai ma le fono a ekalesia a Samoa. “Aemaise ole anapogi o lea e amata mea ai le Fono a Ekalesia, ae ole fono a ekalesia, uma a Samoa.”
Ole anapogi, e tele lava itu ma mafuaaga e anapogi ai le Kerisiano, ma e lē na’o le amataga foi ole tausaga e anapogi ai, pei ona talanoa le paaga faamoemoeina. Ua lamalama faaiu foi le anapogi umi 40 aso ale talitonuga ale Ekalesia Katoliko ile Atua.
Faatusa ile vaiaso e tasi na faamamalu ele malo mo tatalo ma anapogi, lea ua tapunia. Ole aloaia o lena anapogi faalauaitele ale atunuu atoa, e lē gata ina tatala aloaia, ae na faia faapitoa foi le lotu ile malumalu ole ekalesia Metotisi i Matafele Apia e tapuni faapitoa ai.
Molimauina sa auai atu iai taitai ole malo, i lena sauniga tāua, na aofia ai lana Afioga ile Ao ole Malo, Tuimalealiifano Vaaletoa Sualauvi II ma le Masiofo, Faamausili Leinafo, le afioaga ile Palemia ia Tuilaepa Lupesoliai Sailele Malielegaoi, o minisita ole Kapeneta, faipule ole Palemene, faaulu o matagaluega ale malo ma le loaloa ole atunuu na o latou aloaia lea vaiaso faapitoa, sa faato’a taumafa ai le isi ile aoauli talu mai le vaeluaga ole po, poo le 12am-12pm. Ole 27 ai lenei o tausaga talu ona faavae le lotu anapogi ma talosaga ale malo ile Atua mo lana puipuiga i luga o Samoa, i taimi ole tau o afā E manatua ai pea lava le afioga ile Palemia ua tuua le malo, Tofilau Eti Alesana ma le faavae mai ole fale tatalo i Vaea, ile tuanai ai o ‘Ofa. E oo mai nei e manatua pea le tele o afā mulimuli ane na agai mai i Samoa ma manu’a mitimiti.
Ae lē o galo lava foi le afā na toe liliu ese lava ua oo mai lana taamilosaga i luga ane o Samoa, ae toe alu ese atu lava, sa talitonu le toatele ole mana o talosaga ma anapogi o lena vaitaimi na toe fuli ai le afā ma alu ese atu ma Samoa. O iina na saga faamalosia ai le talitonuga faakerisiano o tatou tagata ma faaauau mai ai lava le lotu tatalo ta’i vaiaso ale malo, faapea le vaiaso tatalo ma anapogi ile amataga ole tausaga. Ina ua toe osofaia Samoa ele afā o Eveni 2012 ma lopala ai vaega ole taulaga i Apia, faapea le galulolo na maliliu ai le silia ile 130 e aofia ai ma tulisi, i nisi o nuu tu matafaga i vaega i Saute o Upolu, na tuua’ia ai foi le faatauagavale ile faapaiaina ole Aso Sapati ole Alii. Peitai, ile taimi nei, ua tausolomua ai ile taitai ole atunuu le afioga ile Palemia ona talanoa i ituaiga o faailoilo nei pei o afā, “ole ā le silasila mai ale Atua ile tatou atunuu ile mea e tatau ona tatou faia, e fai aku e anapogi ae lē anapopogi.
Ole ta lea na aumai ose tamai ta, e na’o le tasi na oo iai, ia ma le lua ae ua mamao atu ma tatou. Masalo ole mea lena e faamanatu mai, e soia tou te talapepelo ile Alii, e leai se isi e pepeloa le Atua.”
