Amuia Oe Samoa

O le tausaga 1989 sa ave au e le malo o Samoa i Filipaina mo aoaoga i mataupu tau Patents & Trademarks. Sa talimalo sui o matagaluega o Fefaatauaiga ma Faamasinoga, ona momoli lea o au i le Hotel Nikko i Makati, Manila. Sa faamatamata au i faleoloa lalata ane nei fia fai sau faatau. Uma le meaai i le faletalimalo, ona faamavae lea ae ou alu i lou potu e malolo.

Taeao e sosoo ai sa ou matamata solo, ma maofa i le toatele o tagata aīsi ma taumulimuli i turisi. Sa foi i le faletalimalo mo le lunch, ona o le aso e sosoo ai e amata ai le faamoemoe na malaga ai.

A o fai le lunch, sa faateia i le pa o se mea, pei se fagai‘a. O‘u tilotilo solo poo le a lea mea, ma vaaia le pa o le faletalimalo ua malepe, ma ua pefu uma.

O lou manatu o se galuega o fai, ma sa le ano i ai. Toe pa se isi mea, ua sili atu lona leotele, ma faafuasei ona tauvalaau le teine o le faletalimalo, ia faapauu uma i lalo, “Get down!” Ou vaai atu ua i lalo uma tagata, ma ou faapau atu ai ma au. Sa ou ata, e mālie, faapea poo se tifaga lea e pue ua maua ai au. Sa le mapu le tauvalaau o le teine, ia fetolofi agai i le sitepu, aua nei tu se isi i luga, ae agai loa i potu.

Na uma le mālie ina ua ou vaaia ua fetagisi tagata ia matou te fetolofi. Ou taunuu i lou potu ma ki le TV, fia iloa ia mea e tutupu. Na ou tei ma fefe i faasalalauga, o le aai o Makati ua nofoia faamalosi e fitafita tetee, e foua le faigamalo a le tamaitai Peresitene o Corazon Aquino. Faato‘ā malamalama ai, e le se tifaga, o au lea ua utia i totonu o se taua. Alu lea aso o faasalalau fouvalega, ma tagata maliliu i taugafana a fitafita tetee ma fitafita a le malo.

Ua le mapu lapataiga i luga o sipika o le faletalimalo, e ta‘u mai mea e fai. Ua faasā ona momoe i moega, ae ave faamalu e pupuni faamalama o potu. A ee le sailini, ona matou o lea i le fogafale i lalo (basement), vaveao poo le aoauli, e savavali i fasitepu, e faasā na faaaogā lifi e feagai ma faamalama e lamatia i pulufana. Nisi taimi e aso atoa o nonofo e faatalitali le toe foi i potu.

Tele taimi e faalogoina le oteotē o fanataavali ma taalili tane tau, ae sili ona ou fefe i ripoti ua i totonu o le faletalimalo fitafita tetee. Ua faasolo ina utiuti meaai, na o falaoa ma supo aua ua faasā ona toe omai taavale i le nofoaga o matou iai.

Sa vaaia le fetagisi o tagata, nisi taimi e sāo, lē mautonu poo le ā le mea e oo i ai. O le basement lea sa ou feiloai ai i se tamatai Samoa e suafa ia Jacinta Tauai mai Fasitoo-Uta o le air hostess a le Air Nauru. Sa fesili poo au o se Samoa, ma fiafia ua iai se Samoa ua ma fetaui. Sa ia saili panadol ou te inu ai, ua niniva, leai o se malologa lelei. Sa ia faafesootai le alii kapeteni e alofa mai pe ou manaomia se fesoasoani.

Ua manatunatu i ou mātua, leiloa mai le mea ua tupu. Tailo i le malo o Samoa poo popole ia te au, pau le mea sa fai, o le fealuai ma le tusifolau. O lou manatu, afai e tupu se faalavelave, o le tusifolau e iloa ai le atunuu ou te sau ai.

Ua fefe ma tatalo faalausosoo. E fitu aso, ae ioe fitafita tetee e aveese uma tagata mai isi atunuu, momoli i se nofoaga saogalemu, ma toe faafoi i latou atunuu.

Na ou toe foi ma le loto faafetai i le Atua, amuia Samoa e pulea ona tagata. Amuia Samoa e le pei o lea atunuu le fetauai. Amuia Samoa e temokarasi lona malo, ae salani e le feavatai ma le tausi mamalu a pulega a nuu ma itumalo. Amuia Samoa, o lona faavae le Atua, toe osi aiga, e faalupe; o tama ma o latou aiga, o aiga ma latou tama.

E iai ona taitai, taitai o nuu, taitai o aiga ma ekalesia, taitai o taulelea ma aualuma, taitai o aufaipese ma ausiva. E faasoa ma fetuutuunai, e fautele ma nutimea faatasi.

Silasila ia Suria ma Iraq, ua faateteleina le toto masaa. O Aikupito, e faitau afe ua fasiotia, e nonofo le mautonu pe tua ma ni a faiga palota o loma. Ua atulasi na pule e laaumalolosi le tofa saili a le malo o Fiti. O PNG ua falepuipui faamasino sili i le puipuiga o lona faavae, ae taufao le tofi palemia ma sosofa le filemu o tagata lautele. Faatoa galoma atu gasegase o Vanuatu ma Solomona, ina ua faoa e le ta le ‘anofale, ana le aapa Ausetalia faapenei ua tugā ona manu‘a.

Amuia oe Samoa, o lea ua faamanatu le 50 tausaga o lou tutoatasi, sa maliliu ai tuaa ma faaaunuua, a ua manumalo le taualaga “Samoa, fifilemu.” Leitioa fai oe ma fetu taiala, sa e taimua i le Pasefika, ma saoloto mai pulega faakolone ona o lau utaga poto ma tino perofetaga, ia tali i lagi se ao o lou malo. Amuia oe o le penina o le Pasefika, pe folau i malū poo afā e manuia, auā ua tautai e le Atua lou sa.

Ua amanaia au tamafanau i Palemene tetele ma le militeri. Ua mau faailoga au tamafanau, ae le faaitiitia ai le soifua faatuatua i le tapaau. E agiagia lau tagavai mo le isi 50 tausaga, auā ua e faataoto luitau mo tupulaga lalovaoa mo le faaauauina o le tatou mau: Samoa mo Samoa. Se amuia ta ita, o le Samoa. Manūteleina e le Atua le faamanatuina o lou 50 tausaga. Amuia lava oe Samoa. Soifua.