O fea le faipule e afisi a o fea le faipule e faasavali ma lafoai?
Ua fitu nei vaiaso o loo tālia pea se tali mai le Faamasinoga o Apili mo le iloiloina o le talosaga apili a le afioga ia Taito Philip Field.
O le apili a Taito e faasaga lea i le faaiuga sa faia e le faamasinoga, mo le nofosala i le falepuipui mo le fitu tausaga.
Ae oo mai i le asō e lei maua mai lava se tali o le talosaga apili sa tuuina i totonu, ma le faaupuga sa tuuina mai e tusa ma le ono vaiaso e tali mai ai. Ua lē ono vaiaso a o lea ua fitu, savali i le valu vaiaso e lei tali mai lava le faamasinoga.
Na faaalia e le faletua ia Maxine, lona faanoanoa tele ona e foliga mai ai foi a toe faafesagai ma se isi foi faigata e uiga i le apili sa tuuina i totonu, talu ai o le tuai tele ona tali mai ma maua mai se faamatalaga. Sa faamaonia foi e le faletua, ua suia foi le loia o le a feagai ma le mataupu pe afai ae maua mai le tali e pei ona tālia nei.
O loo tumau pea ona faafaigata i le taimi nei ona fesootai atu i le afioga ia Taito i le nofoaga ma le falepuipui o loo iai.
E oo lava foi i nisi o aiga o loo taumafai atu e fia maua se avanoa e asiasi ai, o loo faafaigata pea, ma e lei maua mai lava foi se ioeina o tusi talosaga ua leva ona tuuina i totonu mo asiasiga.
E le o mautinoa i le taimi nei, pe aisea ua faatuaia ai ona maua ane se tali pe talia pe leai foi.
O se tulaga faanoanoa foi lea mo aiga ma uo a le afioga ia Taito, ona o le lē lelei ona faatinoina o fesootaiga ma tagata lautele e ala i mataupu faapea.
Faatusatusa Taito i minisita ma faipule sa faaaogāina tupe o lafoga a tagata lautele
Bill English
O le sui palemia o Niu Sila, sa ia faatagisia vaega tupe e masani ona maua e minisita i le tausaga, e ui lava ina o loo ia faaaogāina lona ia lava fale i Ueligitone. O le faamaninoina o lea tulaga e tusa ai ma aiaiga o sui o le palemene, e mafai ona totogi aluni ia i le tausaga, pe afai e faaaogāina e le faipule poo le minisita, ni nofoaga totogi e pei o faletalimalo ma isi nofoaga.
O le sui palemia sa ia faaaogāina lava lona fale i le laumua, ae sa faaauau pea ona ia tāpā ma faaaogāina alauni e pei ona ta‘ua.
E ui ina ua mae‘a ona ia toe totogi ia tupe, peitai sa fai lava ma le silafia, sa faaaogāina pea tupe a tagata totogi lafoga ma le mautinoa e lē o sa‘o le auala o loo faia mo le faaaogāina o ia seleni tetele. E fesiligia pea le faamaoni (transparency and accountability), ma faiga faaalatua o loo faagaioia ai le faiga, e tusa lava pe sa faapepaina ma faamaumauina, peitai o le mafaufau sa fafau ai le togafiti, e sese ma lē faamaoni.
Phil Heatley
O se tasi lea o minisita o le palemene a Niu Sila, sa iai foi ni tuuaiga i le faaaogāina o credit cards ia e tatau ona faaaogā mo na o mataupu e fitoitonu i le tofiga minisita, peitai sa maua i nisi o suesuega le faaaogā e Heatley e totogi ai nisi o ana faatau e lē talafeagai ma le faamoemoe o ia tupe, aemaise foi se tasi taimi na maua ai, ua ia faaaogā lenei credit card e totogi ai se malaga tafafao a lona aiga i le Motu i Saute.
O nei seleni o loo faaaogā e minisita, o le mea moni o tupe a tagata totogi lafoga. O le faafitauli lava e tasi o le lē faautauta ma le silafia o le mea moni ae lē mafai ona savali ai. E sili atu ona telē le solitulafono o lē na te fafauina le agasala nai lo lē na te faataunuuina.
E matuā fesiligia lava foi lea tulaga atoa ai ma le faamaoni ma faiga amiotonu a taitai o le malo ma le atunuu. E mafua i se ā ona vave ona siilima ma toe totogi tupe ua faaaogā sese, o le fefe ma le mata‘u i le tulafono ma le faasalaga.
Rodney Hide
O le alii minisita na ia ave lava uo tamaitai i sana malaga faapalemene, ma ia faaaogā ai foi ni vaega tupe se tele mo ona manaoga mo ia lava.
O se faiga e matuā lē taliaina ma ua matuā see ese ai foi ma faiga faavae ma nisi o aiaiga i le galuega o se sui o le Palemene.
E lē gata i le faaaogāina o tupe, ae o le faaaogāina foi o malosiaga i o latou tofiga faaminisita ma sui faipule o le maota fono, e faia ai nisi o pisinisi ma fonotaga faaletagata lava ia ma lona aiga. Sa vave foi ona tautino ma toe faafoi ane seleni ina ua faalauiloaina faalauaitele.
Ae faapefea pe ana lē faalauiloaina i tagata lautele ia faiga? Poo le a omiomi ai lava ma saga faaauau ai pea le amioletonu ma faiga faapouliuli ma le piopio? Aisea na lē faia ai se sueusega faapitoa?
Pansy Wong
O le vaiaso talu ai sa faamaonia ai foi se faiga faalilolilo, sa faia e le tamaitai minisita Pansy Wong, ona o sana malaga i Saina ma lona alii.
Mulimuli ane na maua ai foi le faalauiloa e lea tamaitai minisita, o lona tofiga o se minisita o le malo Niu Sila e saini i nisi o feagaiga faapisinisi sa sainia e lona alii a o iai i Saina, o se faiga ua lē talafeagai tele ma aiaiga faavae o tofiga minisita. E lē gata na maua ai foi le faaaogā sese e lea minisita o tupe a tagata totogi lafoga o le atunuu, ina ua totogi ai se la faiga malaga ma lona alii, ae semanū o lena malaga sa faataunuu ai ma ni faiga faapisinisi a lona alii, e lē o ni mataupu faalemalo, lona uiga sa tatau ona lē totogia i tupe a le malo o la pasese mo na faiga malaga. Ua lē ogatusa foi ma faiga amiotonu ma le faamaoni e tusa ai ma le faamoemoe ma le sini autu sa mafua ai ona malaga i fafo.
Hone Harawira
E fai foi si tele o luuga tupe sa faaaluina e lea foi faipule o le Palemene i sana ia foi malaga faapalemene i fafo, ae mulimuli ane sa ia faaaogāina ai foi ma lea avanoa e faataunuu ai ana fuafuaga faaleaiga.
E lē gata i tupe sa faaaluina, o taimi foi auā sa maua pea lava totogi masani, ae faapea foi ma le faaaogāina o le malosiaga o tofiga mo isi atina‘e.
Chris Carter
Sa faaaogā sese tupe e ala i le credit card sa ofoina i ai mo fuafuaga faalemalo e faatau ai ana ia lava meatotino ma faatino ai ona manaoga tau ia te ia lava. Sa molimauina ma faasalalauina faalauaitele lea foi tulaga, ma na oo ai foi ina toe taumafai e totogi ma faasaoina mai le tulaga maualuga o se sui o le Palemene.
Jim Anderton
E tusa ma le $22,000 na maua foi i ni suesuega na faaaluina e lenei alii faipule e fai ai ana faatauga ma totogi ai mea eseese sa ia faaaluina mo ia lava a o iai i sana malaga taamilo i Europa i se tasi o masina i le tausaga e 2003.
O isi foi nei o alii ma tamaitai faipule sa lavelavea foi i nei lava solitulafono o le faaaogā sese o tupe a le malo mo o latou lava manaoga totino, e pei o Clayton Cosgrove, George Hawkins, David Cunliffe, Harry Duynhoven, Marian Hobbs, Trevor Mallard.
E tele ma anoanoai faiga piopio ma faiga lē amiotonu a alii minisita ma faipule o le Palemene a Niu Sila. O ni faiga foi e matuā lē taliaina ma e solitulafono foi lona fuafuaina atoa ai ma lona faataunuuina.
E finauina pea le mataupu ua falepuipui ai le uluai faipule Pasefika i Niu Sila, Taito Philip Field.
Sa mamafa tuuaiga faasaga ia Taito i vaega e pei o le faaaogāina o lona malosi faafaipule, faaminisita e faia ai faaiuga mo nisi o mataupu mo tagata lautele.
Sa faitioina foi i le talia o tupe ma meaalofa mai tagata lautele, o se tali o ana galuega sa faia ma faatinoina mo tagata. E lei iai se tulaga na faapea sa faaaogāina sese ai e Taito ni seleni a le malo ma tagata totogi lafoga.
Afai foi na tauia e nisi e ala i tupe sa foai ma meaalofa, atonu ua talafeagai foi lea auā e tele sona taimi ma lona mafaufau sa tigaina ma faaalu ai. A faatusatusa i faiga sa tulai mai i le toatele o sui o le Palemene e pei ona ta‘ua i luga, ua mautinoa ai le ‘alo‘alo mamao ma le taumafai e mimilo le tulafono.
Afai na faigofie ona faatonuina se suesuega e fai mo Taito, o faiga amiotonu ma le faamaoni e tatau ona ui uma ai sui o le Palemene i lea alafua ma le alavaa sa faataoto mai.
E lē afaina pe sui le faiga malo, poo ai foi e tulai mai e tauave le malo, a o le mea moni ma le faamaoni ia tutusa le faatinoina o faiga ma suesuega mo soo se tasi e aafia i mataupu faapea.
Ua faatino pea le faaiuga a le faamasinoga i le Afioga Taito, ae o loo tumau pea le finau mai a le alii faipule, e na te lei solia le tulafono. O faipule ma minisita e pei ona ta‘ua i luga, sa latou ioeina lo latou solia o le tulafono. O le fesili tele la, o fea ni o latou faasalaga ogaoga mo na soligatulafono?
Na faatepa soo e le faamasinoga ia Taito le manatu, e mamafa lona faasalaga ona o ia o se tasi sa fafauina tulafono ae ua ia toe solia. Ae faapefea la isi faipule? Poo lona uiga ea, e lē ni faipule na fafauina tulafono, fua i lo latou solia, ae leai ni faasalaga ogaoga e tuu i ai? O le a tatou tulituliloa pea lenei mataupu.
O loo tālia nei ma faatalitali pea poo afea e tali mai ai le talosaga apili a le afioga ia Taito e pei ona ua mae‘a le taimi sa faailoa muamua e tatau ona tali mai ai.
