Na faia le faaiuga a le Faamasinoga Maualuga ia Novema o le tausaga ua mavae ma faasalaina ai Semi Samau i le lima tusaga e nofosala ai i le toese ina ua faamaonia ona moliaga e sefulu e aofia ai moliaga o le lima tagoese a o avea ma tagata faigaluega, le taliaina o tupe i se auala lē faamaoni, ma le faasese o faamaumauga tau tupe.
Na talia le talosaga a le loia a le pagota mo le auina i Niu Sila mo togafitiga i ni aiaiga ma tuutuuga. E aofia i ia aiaiga le tuuina atu o se tinoitupe e sefulu afe faatasi ma le sainigalima a ni tagata se toatolu e faamaonia ai le toe foi mai o lē ua faasalaina. Sa faatonuina foi e taofia lona tusifolau e leoleo i Niu Sila pe a taunuu i Aukilani.
Ua toe foi mai i Samoa le alii pagota o Semi Samau sa auina i Niu Sila mo ni togafitiga faafomai i lona gasegase o le fatu, talu mai Tesema o le tausaga ua mavae 2010. Sa fofogaina i le faamasinoga i le aso 9 o le masina nei o Mati le mataupu lenei, peitai na tuuina atu e le loia mo Semi se talosaga, mo ni aso faaoopoopo e nofo ai i Niu Sila le pagota mo nisi togafitiga ma suesuega faafomai. E lei taliaina e le alii faamasino o Justice Pierre Slicer le talosaga, ma ia poloaina ai se tusi saisai mo Semi Samau.
Peitai na taofia o ia i le falemai i Motootua mo togafitiga ona o ni aafiaga i lona gasegase o le fatu.
E lei tuuina atu o ia i le falepuipui ae taofia ai pea i le falemai a o faia tapenaga mo le auina atu i Niu Sila mo nisi togafitiga lea na fuafua ai e faia se taotoga pe a faaolatia i Niu Sila. Mai ia Tesema o le tausaga 2010 e oo mai ia Mati 2011, e lei faia se taotoga ae na o siaki ma vai faapea ma fualaau sa faatonuina e fomai e inu. O le mafuaaga lea o le lē talia e le faamasinoga o se isi faaopoopo o aso e pei ona sa talosagaina e le loia mo Semi Samau e pei ona faailoa mai e se loia a le Malo.
O le Aso Gafua na tea nei, 21 o Mati 2011 na faato‘ā taunuu ai i Samoa le pagota i le tuanai o aso e lima talu ona poloaina se tusi saisai. Ua faaalia e se molimau faatuatuaina o le aso lava lea na tulai ai Semi i le faamasinoga ma faailoa ai lona toe foi mai i le atunuu. Ua iai nei o ia i le falepuipui i Tafaigata faatasi ai ma isi pagota o loo tuli o latou faasalaga.
O Semi Samau sa avea ma loia, ae o le taimi sa galue ai i le faletupe o atiina‘e a Samoa lea sa taiulu ia te ia le vaega o mataupu tau tulafono a le faletupe, na alia‘e mai ai tuuaiga ma molia ai e leoleo ina ua mae‘a ni suesuega i ni vaegatupe na aafia a le faletupe.
