“Ua ave tusi i tagata ese e tuua loa fanua o loo nonofo ai”
Ua amata totogi atu nei e aiga o le foaiala ma le nuu o Vaitele-tai, tupe o le tau o o latou fasi fanua tau kuata eka sa o latou lisiina mai i le Faalapotopotoga o Eleele o Samoa (Samoa Land Corporation).
O le masina na tea nei o Oketopa na amata ai ona totogi tau o fanua ina ua mae‘a ona molitai tusi mai le Faalapotopotoga i aiga e silia i le to‘a sefulu e lē o lavea i le lisi o aiga ma tagata o le foaiala e agavaa ona nofoia ia eleele.
Ua maua e le tusitala se molimau e faapea o ia tusi na aoina uma e se tasi o matai o le foaiala o loo ia faamaopoopoina ia aiga ma tagata ese, ma le faamatalaga e nonofo ai pea.
O le to‘a lea o loo feagai ma nisi o matai ma tagata o le foaiala ona ua ta‘ita‘i seseina ia aiga i le tulaga tonu o eleele, ona o loo iai lo latou talitonuga o latou e tatau ona nofoia fasi fanua ona e faapea sa latou fainuu.
Peitai ua faaailoa mai e se ofisa sinia o le Faalapotopotoga o Eleele a Samoa, o fanua o le Malo sa lisi i alii ma faipule o Vaitele-tai.
O lona uiga e lē o se meatotino a le nuu, ae se‘i vaganā ua mae‘a ona totogi fasi fanua e pei ona iai le tuutuuga ua iai nei, ona faato‘ā umia lava lea e le matai ma lona aiga le eleele.
“E lē o ni fanua foi e faapea sa pulea e se suafa matai o le nuu, e pei ona foliga o se finauga lea a le matai o Toi Ioane o loo ia faamaopoopoina aiga ese e lē o ni tagata Vaitele”.
O le finagalo lea o le ofisa sinia o le SLC poo le Samoa Land Corporation.
O le faai‘uga o le masina nei o Novema o loo tuu avanoa ai le SLC i aiga ua tusia suafa i fasi fanua e totogi muamua atu ai le $1,500 o le lesitala mo le kuata eka e tasi, ona faato‘ā sainia ai lea o le feagaiga ma aloaia le lesitalaina o se fasi fanua i lalo o se suafa o se matai ma tagata moni o Vaitele.
Ua mae‘a le 20 tausaga sa lisiina muamua ai ia eleele ma o le fuafuaga fou lea ua faatau ai fanua, ina ua tulai mai foi nisi vesiga i tausaga ua mavae i le va o alii ma faipule ona o tagata na avatu e nisi o aiga sa ave i ai ia kuata eka latou te nofoia ma faato‘a i nai laau tau faato‘aga.
O loo iai le naunautaiga o le pulega o le SLC ia oo atu i le tausaga fou ua sologa lelei le feteenaiga o loo aafia ai ia fanua, ma o ane loa tagata moni o Vaitele-tai e nofoia ma fai le nuu ia lelei.
