O le amataga o lenei tausaga ua vaaia ai foi le faaauauina o polokalame faagasolo a le EFKS i Sini ma ana pulega i taaloga Kirikiti lea na faia suega siamupini i le Aso Toonai. Na faaalia e le susuga i le faifeau o le EFKS a Camden i Sini, Rev Namusua Mareko, na matagofie ma faatumulia le po o pesepesega o le Kerisimasi na feagai ai ma le matagaluega i le aso 23 ma le 24 o Tesema.
“Na faatino e le Autalavou a le EFKS Canterbury le tala o le Kerisimasi ae na tapena e isi autalavou e valu pesepesega ma faaevagelia.”
Na vaaia le ola ma le faagaeetia o Pesepesega ma tala o lea afiafi ma o se avanoa lelei na mafuta ai mātua ma fanau i le sipili o le afio mai o le Faaola.
O le vaiaso talu ai na faamanatu ai foi le 69 tausaga o le soifua o le toeaina Faatonu, Rev Elder Peleti Toese Toailoa o le EFKS i Fairfield, i Sini. O loo galulue ai ma le faletua ia Senetenari, ma o le lona fasefulu ai lenei o tausaga talu ona galulue auauna i le finagalo o le Alii.
O se mitamitaga tele foi le ausia o lenei laasaga i le soifua o le Afioga i le Faatonu ma le maopoopo o polokalame aemaise autalavou o pulega ma matagaluega a Sini Sisifo, Sini Matu ma Sini Saute.
Na vaaia foi le sao tele o lenei mafutaga i le tauaveina o tu ma agaifanua a Samoa e pei o le gagana Samoa e tautala ai i aso uma, faapea le gagana faaaloalo ma le gagana o le talalelei.
Na toe faamanatu i nei taaloga Kirikiti le tāua o le fetufaai fiafia ma faatauvaga i mea nei o faagatama e pei o le mau i Korinito.
Na saunoa foi le taitai o Taaloga ma Autalavou, Rev Mose Galuvao o tausaga uma lava e mataina ai lava le tauiviga a ‘au malolosi mai Saute, Sisifo ma Matu e pei ona vaaia i le faatumulia o Endeavour Park i Fairfield.
O le isi vaitau o le a tapenapena i ai Pulega, o le Eseta auā lava polokalame mo Autalavou ma Ekalesia mo le malosi o le tino aemaise le agaga.
