Amata taamilosaga Aukilani Samoa 2013

O se tasi lenei o atinae i tausaga taitasi o loo matauina pea le maulauga o ana taumafaiga i tausaga uma, e lē gata i le faatāuaina e afioga i alo ma fanau ua aumau nei i Niu Sila, ae o se avanoa tele o loo galulue soosootau‘au ai le Iuni Faatamā o le tatou atunuu i Samoa i le lakapi faapea foi ma le Iuni a le Aukilani Samoa i le tau atinaeina o alo ma fanau a Samoa i lenei lava Taaloga.
I le amataina la o le taamilosaga o lenei tausaga sa vaaia ai le faaofi ai o taaloga a le fanau laiti under 6 sa tala mae ‘a i taaloga o lea Aso, matagofie le lagolago a matua faapea le Iuni i lea amataga fou i lenei tausaga.
Na mae‘a lea ona faagasolo loa lea o taaloga i faagasologa seia oo lava ina ua taualugaina i le taaloga o le talita lea sa luiina ai e Malisi le talita o loo umia pea e Saleimoa mai le tausaga talu ai, faasolosolo atu ina vaaia le naunau o Au taitasi i lenei taamilosaga aemaise ai lava o loo pulea lelei e le asosi a Aukilani i alii laufali i taaloga uma ae faapea foi uiga faatupu misa ina ia puleaina lelei i le malae taaalo.
Ua faafaigofieina galuega a le Komiti o taaloga ona o le auai ai o pulega o au taitasi. Aemaise ai lava le avanoa e ono filifilia ai nisi i au filifilia a Samoa i le lumanai, o loo maitautuina i le taamilosaga i lenei tausaga le tulaga siitia o kalapu taitasi i tapenapena o le taamilosaga ua amataina nei. O loo ua iai fuafuaga ina ia faatāuaina i lenei tausaga le auai ai o Au a tamaitai ma Au laiti i taaloga o lenei tausaga.