Ua mae‘a nei ona faatulaga se siitaga fou o pasese o taavale laiti poo taxi ma pasi la‘upasese na amata faamamalu i le aso ananafi, Aso Gafua mulimuli o le masina lenei o Aperila, aso 28.
E lei faailoaina mai totogi fou o pasese ae ua faaalia e le pulega o feoaiga i luga o le laueeleele le Land Transport Authority o le a maua tusi ua iai lisi fou o le totogi o pasese mo soo se tasi e aunoa ma se totogi, ina ia silafia lelei ai le siitaga.
E faatoa lagona le iuleo o le lē fiafia ma le aufaitio, pe a maua mai lisi o le totogi fou o pasese, aemaise o le a faatoa lagona foi ni faaseā pe a iai ni faaletonu e tulai mai i aga ma uiga a le au avetaavale laupasese ma pasi pe a iai nisi totogi faaopoopo latou te faia e aunoa ma le mulimulitaia o le totogi fou o pasese ua pasia e le Kapeneta.
O loo laumanuia nei le silasila foi o le pulega o le faalapotopotoga o vaa a le atunuu e siitia foi pasese mo malaga i le va o motu i Upolu ma Savaii faapea malaga agai atu i Amerika Samoa. O lea foi ua faailoa e le faalapotopotoga o le malosi tau eletise le EPC, le siitaga fou o le totogi o le eletise, lea e lē o iai se sii mo iunite e faatau mai le tasi i le lima sefulu, seia vaganā luga atu e oo i le selau ma le luaselau iunite.
Ua faailoa foi e le EPC le faaopoopo o se totogi e limasefulu sene mo iunite e faatau ile sefulu ma le luasefulu tala, seia vaganā ua sili atu i le luasefulu ma le sefulu tala ona lē tapa lea o le totogi fou lea e limasefulu sene. Ua sa‘o upu o loo tuumumusu ai le toatele, e lē o toe iai se mea e maua fua i nei aso, ua faatau lava i le tupe.